काठमाडौं । इन्डोनेसियाको माउन्ट रुआङमा बुधबारदेखि लगातार ज्वालामुखी विष्फोट भइरहेको छ । यहाँ २४ घण्टामा ५ पटक ज्वालामुखी विस्फोट भएको छ । खतरालाई मध्यनजर गर्दै रुआङ वरपरका ११ हजार मानिसलाई सुरक्षित स्थानमा पठाइएको छ ।

विपद् व्यवस्थापन अधिकारीहरूले आगामी २४ घण्टाका लागि विमानस्थल बन्द राख्न निर्देशन दिएका छन् । ज्वालामुखीबाट निस्कने लाभा र खरानीका कारण सुनामीको चेतावनी जारी गरिएको छ । अल जजीराका अनुसार माउन्ट रुआङमा पहिलो विस्फोट मंगलबार (अप्रिल १६) राति ९:४५ बजे भएको थियो।

जसका कारण हजारौं फिट अग्लो लाभा उठेर खरानी फैलिएको छ । यसअघि सन् १८७१ मा इन्डोनेसियामा अहिलेसम्मकै सबैभन्दा ठूलो ज्वालामुखी विस्फोट भएको थियो। इन्डोनेसियाको प्रकोप केन्द्र अलर्ट मोडमा छ।

विपद् व्यवस्थापन अधिकारीहरूका अनुसार हालै माउन्ट रुआङ नजिकै दुईवटा भूकम्प गएको थियो। यस कारण टेक्टोनिक प्लेटहरू अस्थिर भए, जसले ज्वालामुखी विस्फोटको कारण बन्यो।

अधिकारीहरूले मानिसहरूलाई उद्धार गर्न २० उद्धारकर्मी खटाइएको बताएका छन्। अल जजीराका अनुसार इन्डोनेसियाको ज्वालामुखी एजेन्सीले खतरालाई ध्यानमा राख्दै लेभल ४ को चेतावनी जारी गरेको छ । यसबाहेक ज्वालामुखी नजिकको ६ किलोमिटर क्षेत्रलाई विशेष क्षेत्र घोषणा गरिएको छ ।

इन्डोनेसियाको भूगर्भ एजेन्सीका अध्यक्षले भने, “रुआङ ज्वालामुखी विष्फोटपछि खरानीको बादल आकाशमा २ किलोमिटरको उचाइमा पुगेको थियो। दोस्रो विष्फोटपछि यो उचाइ बढेर २.५ किलोमिटर पुगेको थियो। ।”

अल जजीराका अनुसार इन्डोनेसिया ‘रिङ अफ फायर’ क्षेत्रमा पर्छ । प्यासिफिक महासागर नजिकै घोडा जुत्ताको आकारको टेक्टोनिक फल्ट लाइनहरू छन्। देशमा १२० सक्रिय ज्वालामुखीहरू छन्।

यसबाहेक विमानस्थल प्राधिकरणले रतुलाङ्गी अन्तर्राष्ट्रिय विमानस्थलका सबै उडान रद्द गरेको छ । यस विमानस्थलबाट चीन, सिंगापुर र दक्षिण कोरिया जाने उडान प्रभावित भएका छन् ।

ज्वालामुखीको प्रभाव छिमेकी मुलुक मलेसियामा पनि देखिएको छ । मलेसियाको किनबालु अन्तर्राष्ट्रिय विमानस्थलमा धेरै उडानहरू ढिलो भइरहेका छन्।

यसअघि गत वर्षको डिसेम्बरमा इन्डोनेसियाको मारापी ज्वालामुखी विष्फोट भएको थियो। यस अवधिमा ११ आरोहीको मृत्यु भएको थियो। २ हजार ८९१ किलोमिटरको उचाइमा रहेको ज्वालामुखीले करिब ३ किलोमिटर उचाइमा खरानी फालेको थियो ।

२०१८ मा इन्डोनेसियाको क्राकाटाउ ज्वालामुखीको विस्फोटले सुनामी निम्त्यायो जसले सुमात्रा र जाभाको तटमा पहाडको केही भाग समुद्रमा खसेपछि ४३० जनाको मृत्यु भयो।