काठमाडौं । इजरायलमाथि इरानको आक्रमण र युद्ध थप चर्किने डरले जोर्डनलाई खतरामा पारेको छ । जोर्डन पश्चिमी देशहरूको प्रमुख सहयोगी र खाडी राष्ट्रहरूको सुरक्षाको दृष्टिकोणले महत्वपूर्ण मानिने अरब राष्ट्र हो।

इरानले शनिबार राति इजरायलमा क्षेप्यास्त्र र ड्रोनका साथ शृंखलाबद्ध आक्रमण गर्दा, जोर्डनले आफ्नो राजधानी अम्मानमा उडिरहेका केही मिसाइल र ड्रोनहरूलाई खसाल्न मद्दत गर्‍यो।

इरानको आक्रमणलाई विफल पार्न मद्दत गर्ने सम्बन्धमा जोर्डनका विदेशमन्त्री अयमान सफादीले आफ्नो देशले आफ्नो क्षेत्रबाट मिसाइल र ड्रोनलाई खतराका रूपमा हेरेर खसालेको बताए।

यो खबर बाहिर आउने बित्तिकै जोर्डनमा सामाजिक सञ्जालमा जनताले जोर्डन सरकारको आलोचना गर्न थाले । यो देखेर आयमान सफिदीले सन्तुलन बनाउन तुरुन्तै भने – इजरायलले इरानमाथि हमला गर्न जोर्डनको एयरस्पेस प्रयोग गरेमा पनि जोर्डनले यस्तै गर्नेछ ।

सफिदीको बयानपछि पनि सामाजिक सञ्जालमा जनताको आक्रोश कम भएन र जोर्डनका राजा अब्दुल्लाह द्वितीयलाई सोसल मिडिया साइट एक्समा मानिसहरूले ‘देशद्रोही’ भन्न थाले। इरान समर्थक खाताहरूले मिमहरू साझा गर्न थाले जसमा राजालाई इजरायली रक्षा बल (आईडीएफ) को वर्दीमा देखाइएको थियो।