काठमाडौं । इजरायलको अल जजिरा टिभी नेटवर्कमा प्रतिबन्ध लगाएपछि च्यानलका प्रबन्धकले इजरायली सरकारको यो कदमलाई खतरनाक भन्दै सञ्जालको टोलीले कानुनी प्रतिक्रियाको तयारी गरिरहेको बताएका छन् ।

आइतवार, इजरायली सरकारको मन्त्रिपरिषद्ले अल जजिरा टिभी नेटवर्कलाई देशको राष्ट्रिय सुरक्षाको लागि खतरा भएको भन्दै प्रतिबन्ध लगाउने प्रस्तावलाई अनुमोदन गर्‍यो।

प्रतिबन्धहरू अन्तर्गत, इजरायल भित्र अल जजिराका कार्यालयहरू बन्द गरिनेछ, प्रसारण उपकरणहरू जफत गरिनेछ र च्यानललाई उपग्रह र केबल कम्पनीहरूबाट काटिनेछ। यसबाहेक अल जजिरा च्यानलको वेबसाइटलाई पनि देशमा प्रतिबन्ध लगाइनेछ।

इजरायली सरकारले लामो समयदेखि अल जजिरालाई इजरायल विरोधी भएको आरोप लगाउँदै आएको छ।

अल जजिरा च्यानलमा कतार सरकारको पनि हिस्सेदारी छ। गाजामा बन्धक इजरायलीहरुको रिहाईका लागि जारी वार्तामा कतारले महत्वपूर्ण भूमिका खेल्दै आएको छ ।

चार इजरायली विदेशमन्त्रीका सल्लाहकार रहेका पूर्व इजरायली कूटनीतिज्ञ एलोन पिन्कासले बीबीसीसँग कुरा गर्दै इजरायली सरकारको यो कदमको आलोचना गरेका छन् ।

उनले अल जजिरालाई गलत समयमा प्रतिबन्ध लगाइएको बताए । पिनकासले भने – यी प्रतिबन्धहरूले अल जजीरालाई रिपोर्ट गर्नबाट रोक्न सक्दैन।