काठमाडौं । इजरायली सेनाले सोमबारदेखि करिब तीन लाख मानिस रफाह छोडेर मानवीय क्षेत्रतर्फ सरेको बताएको छ ।

सोमबार इजरायली सेनाले रफाहका जनतालाई छिमेकी क्षेत्रतर्फ जान आग्रह गरेको थियो । इजरायली सेनाले तटीय क्षेत्रको साँघुरो पट्टी अल-मावासीलाई मानवीय क्षेत्र घोषणा गरेको छ।

तर संयुक्त राष्ट्रसंघले यति ठूलो संख्यामा मानिसलाई यहाँ बस्नका लागि पर्याप्त व्यवस्था नभएको बताएको छ ।

संयुक्त राष्ट्रसंघका अनुसार यहाँ न पानी छ न सरसफाईको व्यवस्था छ ।

इजरायली सेनाले रफाहमा हमास लडाकुलाई आक्रमण गर्ने योजना बनाएर अगाडि बढिरहेको छ।

शनिबार, सेनाले रफाहको पूर्वी क्षेत्रबाट दशौं हजार थप मानिसहरूलाई रफाह छोड्न भनेको थियो ।

यसैबीच, इजरायली सेनाले प्यालेस्टिनीहरूलाई उत्तरी गाजाका केही क्षेत्र छोड्न पनि आदेश दिएको छ।

मानिसहरू बाहिरिएपछि रफाहका केही क्षेत्रमा सन्नाटा छ।

केही दिनअघिसम्म गाजाका अन्य भागबाट आएका स्थानीय जनता र शरणार्थीहरूले भिडभाड हुने क्षेत्र अहिले पूर्ण रूपमा खाली छन् ।

इजरायली ट्याङ्कले रफाहलाई घेरेर अब सेना अगाडि बढ्न सक्ने विश्वास गरिएको छ ।

पछिल्लो २४ घण्टामा इजरायलले रफाहमा धेरै ठूला हवाई आक्रमण पनि गरेको छ ।

इजरायलले हमासको स्थानलाई निशाना बनाएको बताएको छ ।