काठमाडौं। नेपाल कम्युनिष्ट पार्टी (एकीकृत समाजवादी)का अध्यक्ष एवं पूर्वप्रधानमन्त्री माधवकुमार नेपालले पार्टीको आसन्न दशौं राष्ट्रिय महाधिवेशनमा जुट्न पार्टी पंत्तिलाई निर्देशन दिएका छन्।

पेसागत महासंघ नेपालको २९औँ स्थापना दिवसका अवसरमा आज आयोजित कार्यक्रममा उनले कुनै पनि अन्योलमा नपरी पार्टीको मुख्य ध्यान संगठन विस्तार अभियान नै रहेको बताए। जनतामा रहेको निराशा र छटपटीलाई सम्बोधन गर्न पार्टीले आवश्यक राजनीतिक पहलकदमी लिने जनाउँदै उनले भने, “पार्टी सरकारमा सहभागी छ, मन्त्रीहरुबाट परिणाममुखी काम होऊन्, सरकारले राम्रो काम गरोस्।”

अध्यक्ष नेपालले प्रधानमन्त्री पुष्पकमल दाहाल ‘प्रचण्ड’सँग आज भेट भएको जानकारी दिँदै आफ्नो पार्टीले सरकारलाई विश्वासको मत दिने बताए। संघीय मामिला तथा सामान्य प्रशासनमन्त्री भानुभक्त जोशीले सरकारले मुलुकमा सामाजिक–आर्थिक रुपान्तरणका लागि नीति तथा कार्यक्रमलाई प्राथमिकतामा राखेको बताए।

उनले देशमा सुशासन कायम गरी विकास तथा समृद्धिका लागि आफू प्रतिबद्ध रहेको बता । सो अवसरमा महासंघका विभिन्न प्रकाशन विमोचन गरिएको थियो।