काठमाडौं । बेंगलुरुबाट कोची जाँदै गरेको एयर इन्डिया एक्सप्रेसको विमानको इन्जिनमा आगलागी भएपछि आपतकालीन अवतरण गर्नुपरेको छ ।

विमानमा सवार यात्रुहरूले दाहिने इन्जिनबाट धुवाँ निस्किएको देखे, त्यसपछि विमान अवतरण गरिएको थियो। उडान नम्बर आइएक्स ११३२, १७७ यात्रु र छ जना चालक दलका सदस्यहरू लिएर राति ११.१२ बजे केम्पेगौडा विमानस्थलमा अवतरण भएको थियो।

सो क्रममा विमानस्थल प्राधिकरणले आपतकाल घोषणा गरेको थियो । विमानस्थलका अधिकारीहरुका अनुसार विमान अवतरण गरेको केही मिनेटमै आगो निभाइएको थियो ।

एक विज्ञप्तिमा एयर इन्डियाले भन्यो, “कुनै यात्रु घाइते भएनन्, चालक दलका सदस्यहरूले सबैलाई सुरक्षित रूपमा बाहिर निकाल्न सफल भए। यात्रुहरूलाई पर्न गएको असुविधाप्रति हामी क्षमाप्रार्थी छौं र हामी वैकल्पिक व्यवस्था मार्फत सबै यात्रुहरूलाई जतिसक्दो चाँडो गन्तव्यमा पुर्‍याउने प्रयास गरिरहेका छौं ।”

आइतबार बिहानको उडानमा १२२ यात्रुलाई कोच्चि पठाइएको एयरलाइन्सले बीबीसीलाई बताएको छ। बाँकी यात्रुलाई अन्य उडानबाट पठाइने प्रवक्ताले जानकारी दिए ।

तर, एक यात्रु डोय जेफरी चेरीले बीबीसीलाई भनेअनुसार दुई वा तीन जना यात्रुलाई मात्र होटलमा सारिएको छ भने बाँकीलाई विमानस्थलको सामान क्षेत्रमा प्लास्टिकको कुर्सीमा बस्न बाध्य पारिएको छ।

उनले भने, “मेरी आमा ७२ वर्षकी भइन्, उनलाई पनि कुर्सीमा बस्न लगाइयो। १०-१५ जना ज्येष्ठ नागरिक र केही साना बालबालिकालाई पनि प्लाष्टिकको कुर्सीमा बस्न लगाइयो।”

डा चेरीले भने, “तर उनीहरूले केही खानेकुरा र पानी दिए । तिनीहरूले हामीलाई बिहानको फ्लाइटमा पठाए त्यसैले तिनीहरूले हाम्रो बस्नको लागि व्यवस्था गर्नुपर्थ्यो। सुरुमा उनीहरुले छिट्टै उडान पाउने बताए, त्यसपछि बिहान ८ बजे, १० बजे र त्यसपछि १२ बजे । अन्तमा, १२२ यात्रुका लागि उडान व्यवस्था गरियो।”

डा चेरीका अनुसार विमानमा आगो देख्नेबित्तिकै पाइलटले मानिसहरूलाई नआत्तिन भनेका थिए।

उनले भने, ‘हामी छिट्टै तल झर्यौँ । हामीलाई हातको सामान नलिइकन विमानबाट ओर्लन भनियो। कतिपय यात्रुले हात झोला माग्थे । सुरुमा अधिकारीहरूले हात झोला सिधै अर्को उडानमा सारिने बताएका थिए। सुरुमा उनीहरुले मानेनन् तर पछि झोला दिए किनभने धेरै मानिसको औषधि पनि यसमा थियो ।”

शनिबार, तिरुवनन्तपुरमबाट बैंगलोरका लागि अर्को एयर इन्डिया एक्सप्रेसको उडानलाई प्राविधिक त्रुटिका कारण तिरुचिरापल्ली एयरपोर्टमा आपतकालीन अवतरण गर्नुपरेको थियो। उक्त उडानमा १३७ यात्रु थिए ।

रिपोर्टहरूका अनुसार, मे १७ मा, बेंगलुरु आउँदै गरेको एयर इन्डियाको उडानलाई विमानको सहायक पावर इकाईबाट चेतावनी संकेत प्राप्त भएपछि दिल्ली फर्कनुपरेको थियो। यो उडानमा १७५ यात्रु थिए ।

बेंगलुरु कोची उडानको बारेमा, एयर इन्डियाको एक विज्ञप्तिमा भनिएको छ, “घटनाको कारण पत्ता लगाउन नियामकसँगको सहकार्यमा अनुसन्धान गरिनेछ।”

बैंगलोर इन्टरनेशनल एयरपोर्ट लिमिटेडका प्रवक्ता भन्छन्, “मे १८, २०२४ मा, बेंगलुरुबाट कोच्चिको उडान आइएक्स ११३२ मा इन्जिनमा आगो लागेको खबर आयो, जसका कारण राति ११:१२ बजे बीएलआर एयरपोर्टमा आपतकालीन स्थितिमा अवतरण गरिएको थियो। अवतरण लगत्तै पूर्ण आपतकालिन घोषणा गर्दै आगो निभाइएको थियो। विमानमा सवार सबै १७९ यात्रु र ६ जना चालक दलका सदस्य सकुशल छन् ।”