काठमाडौं । रुसी राष्ट्रपति भ्लादिमिर पुटिनका दुई छोरी छन् । मारिया भोरोन्टोभा (३९) र काटेरिना तिखोनोभा (३७)। उनीहरू रुसका धनी केटीहरूमा गनिन्छन्। दुवैले रुसमा राष्ट्रपति भवनसँग सम्बन्धित काम हेर्छन्।

सीएनएनका अनुसार पुटिनका छोरीहरू सार्वजनिक रूपमा विरलै देखिन्छन्। यसैबीच, उनीहरू दुवैले सेन्ट पिटर्सबर्ग इन्टरनेशनल इकोनोमिक फोरममा भाग लिएका थिए। पश्चिमा सञ्चारमाध्यममा यसको निकै चर्चा भइरहेको छ ।

रुसी मिडिया हाउस नोभाया गजेटा युरोपका अनुसार पुटिनका दुवै छोरीले यसअघि हरेक वर्ष हुने सेन्ट पिटर्सबर्ग फोरममा भाग लिइसकेका छन् तर अहिलेसम्म कान्छी क्याटेरिना मात्र वक्ता बनेकी थिइन् ।

पुटिनकी कान्छी छोरी कटरिनाले रुसको रक्षा क्षेत्रमा प्राविधिक सहयोगमा काम गर्छिन्। उनी यस कार्यक्रममा भर्चुअल रूपमा सामेल भइन्।

आफ्नो सम्बोधनमा उनले रक्षा क्षेत्रसँग सम्बन्धित विषयमा कुरा गरिन्। उनले सैन्य प्रविधिलाई बलियो बनाउने कुरा गर्दै प्रविधिको आयात अन्त्य गर्नुपर्नेमा जोड दिइन् ।

कार्यक्रममा पुटिनकी जेठी छोरी मारिया भोरोन्टोभा व्यक्तिगत रूपमा उपस्थित थिइन्। मारिया भोरोन्टोभा रुसको स्वास्थ्य मन्त्रालयको एन्डोक्रोनोलोजी विभागकी अनुसन्धानकर्ता हुन्। एन्डोक्रोनोलोजीमा हर्मोनको बारेमा अनुसन्धान गरिन्छ। आफ्नो भाषणमा भोरोन्टोभाले बायोटेक्नोलोजी र बायोप्रोडक्सन बारेमा कुरा गरिन्।

रुस–युक्रेन युद्ध सुरु भएपछि पुटिनका दुवै छोरीलाई अमेरिकाले प्रतिबन्ध लगाएको थियो । पुटिनले आफ्ना सन्तानको नाममा विदेशमा धेरै सम्पत्ति जम्मा गरेको अमेरिकालाई विश्वास थियो । प्रतिबन्ध लगाउँदा पुटिनलाई आर्थिक रूपमा असर पर्ने मानिएको थियो।

रुसमा पुटिनका विपक्षी नेता एलेक्सी नाभाल्नीको यस वर्ष फेब्रुअरीमा जेलमा मृत्यु भएको थियो। आफ्नो मृत्यु हुनुअघि उनले रुसी राष्ट्रपति पुटिनकी जेठी छोरी मारिया भोरोन्टोभाले २०१९–२०२२ को अवधिमा मेडिकल कम्पनीको कर्मचारीका रूपमा १० मिलियन डलरभन्दा बढी कमाएको दाबी गरेका थिए ।

मिडिया रिपोर्टका अनुसार पुटिनकी कान्छी छोरी कटरिनाले पहिले पुटिनको चुनावी भाषण लेख्थिन् । उनले सन् २०१८ को चुनावमा पुटिनको चुनावी अभियानको पनि जिम्मेवारी लिएकी थिइन् ।

कटरिना एक रक-एन-रोल डान्सर हुन् र यूट्यूबमा धेरै लोकप्रिय छिन्। २०१३ मा उनले पुटिनका कट्टर दुश्मन निकोलाई शामालोभका छोरा क्रिल शामलोभसँग विवाह गरिन्।

निकोलाई रुसको सबैभन्दा ठूलो बैंक रोसिया बैंकका सह-मालिक हुन्। यद्यपि, ब्लूमबर्ग न्यूजले २०१८ मा यी दुईको सम्बन्धविच्छेद भएको दावी गरेको थियो ।

पश्चिमी सञ्चारमाध्यमका अनुसार कटरिनाको इगोर जेलेन्स्की नामका प्रेमी पनि छन् जससँग उनको छोरी छिन् । इगोर जेलेन्स्की एक डान्सर हुन् । उनी जर्मनीको म्युनिखमा बस्छन्। २०२२ मा एक जर्मन मिडिया हाउसले दावी गरेअनुसार कटरिनाले २०१८-२०१९ बीच ५० पटक म्युनिखको भ्रमण गरेकी थिइन्।

पुटिनकी जेठी छोरी मारिया भोरोन्टोभाले डच व्यापारी जोरिट फासेनसँग विवाह गरेकी थिइन् । तर, २०२२ मा पश्चिमी मिडियामा उनीहरुको सम्बन्धविच्छेद भएको खबर आएको थियो । यसको आधिकारिक पुष्टि भने भइसकेको छैन ।

भ्लादिमिर पुटिनले १९८३ मा ल्युडमिला ओचेर्तनायासँग विवाह गरेका थिए । मारिया र कटरिना दुवै पुटिन र ल्युडमिलाका सन्तान हुन्। पुटिन र ल्युडमिलाले सन् २०१३ मा सम्बन्धविच्छेद गरेका थिए । क्रेमलिनले अहिलेसम्म यसको पुष्टि गरेको छैन। तर, यसपछि पुटिनले औपचारिक रूपमा विवाह गरेका छैनन् ।

पुटिनका यी दुई छोरीका बारेमा विश्वलाई कुनै जानकारी थिएन । एलेक्सी नाभाल्नीले सन् २०१५ मा पहिलो पटक यो खुलासा गरेका थिए । तर, पुटिनले आफ्ना दुई छोरी मारिया र क्याटेरिना भएको कुरा कहिल्यै स्वीकार गरेका छैनन् ।

पुटिनले सन् २०१५ मा आफू दुई सन्तानको पिता भएको स्वीकार गरेका थिए । उनले एक अन्तर्वार्तामा आफ्ना दुई छोरीहरु विज्ञान र शिक्षा क्षेत्रमा काम गर्ने बताएका थिए । यद्यपि उनले उनीहरूको पहिचान कहिल्यै खुलाएनन्।

पुटिनले एक पटक एक अन्तर्वार्तामा भनेका थिए कि उनी आफ्नो परिवारको बारेमा कुरा गर्न चाहँदैनन्। उनले आफ्नो परिवारको राजनीति र व्यवसायसँग कुनै सम्बन्ध नरहेको बताए ।