काठमाडौं। ‘राष्ट्रका लागि हप्ताको दुई घन्टा स्वयंसेवा’ भन्ने नाराका साथ बागमती सफाइ महाअभियानको पाँच सय ८१औँ हप्ताको सफाइ सुविधानगरस्थित वाग्मती नदी किनारमा गरिएको छ।

सफाइबाट एक मेट्रिक टन नकुहिने फोहर व्यवस्थापन गरिएको अभियानकर्मी किशोरसिंह शाहीले जानकारी दिए। नदी किनारबाट आज उठाइएको फोहर काठमाडौं महानगरपालिका वातावरण विभागको ट्रकमा राखी व्यवस्थापन गरिएको पनि उनले बताए।

सफाइमा पूर्वमुख्यसचिव एवं मुख्य अभियानकर्मी लीलामणि पौडेल, सुविधानगर सामाजिक विकास समितिका अध्यक्ष सुमित्रा कडरिया, सुन्दरीघाट बागमती सफाइ अभियानका संयोजक चित्रबहादुर सुनुवार, बानेश्वर महिला वातावरण प्रालिका अध्यक्ष दुर्गा दुलालज्यू सहितको समूह, आलोकनगर सफाइ संयोजक प्रमिला पौडेल, खोटाङ डेकोरका सञ्चालक योगेन्द्र कार्कीलगायतका सफाइमा सक्रियता थियो। अर्को हप्ताको सफाइ कोटेश्वर महादेवमुनिको पहेँलो पुलस्थित बागमती पुल क्षेत्रमा गरिने भएको छ।

आज सफाइ सम्पन्न गरी असार १५ का अवसरमा दही च्यूरा खाएर सांस्कृतिक पर्वसमेत मनाइएको जनाइएको छ। विसं २०७० जेठ ५ गतेदेखि बागमती सफाइ महाअभियान सुरु भएको हो। सुरु भएदेखि प्रत्येक हप्ताको शनिबार चाड, पर्व, भूकम्प, नाकाबन्दी, कोरोना महामारी आदि प्रतिकूल परिस्थितिमा पनि महाअभियान रोकिएको छैन।

महाअभियानले ११ वर्ष पूरा गरेर १२ वर्ष प्रवेश गरे पनि उल्लेख्य रुपमा नदी सफा हुन नसकेको गुनासो बढ्ने गरेको छ। सफाइ अभियानलाई स्थानीय सरकारले सहयोग नगर्दा यस्तो अवस्था आएको अभियानकर्मीहरुको भनाइ छ।