काठमाडौं । मङ्गलबार केरलाको वायनाडस्थित मेपाडी नजिक पहिरोमा परी ४० भन्दा बढी व्यक्तिको मृत्यु भएको छ ।

केरला सरकारका मन्त्री एमबी राजेशले अहिलेसम्म ४३ जनाको मृत्यु भएको पुष्टि भएको र यो संख्या यसभन्दा बढी हुन सक्ने बताएका छन् ।

समाचार एजेन्सी पीटीआईका अनुसार अहिलेसम्म ४५ जनाको मृत्यु भइसकेको छ । उद्धार कार्यका क्रममा २५० जनाको उद्धार गरिएको छ ।

केरलाका स्वास्थ्यमन्त्री वीणा जर्जले मंगलबार बिहान २–३ बजे पहिरोको घटना भएको बताएकी छिन् ।

यसअघि वीणा जर्जले २४ जनाको शव अस्पताल लगिएको र करिब ७० जना घाइते भएको बताएकी थिइन् । उनले आवश्यक चिकित्सा औषधिहरू वायनाडका अस्पतालहरूमा पुर्‍याइएको बताएकी थिइन्।

पहिरोमा ठूलो संख्यामा मानिसहरु फसेको आशंका छ । मृत्यु हुनेको संख्या बढ्न सक्छ। वनमन्त्री एके ससेन्द्रनले बीबीसीलाई भने, ‘अहिले नै पहिरोमा फसेका मानिसको संख्या भन्न गाह्रो छ ।’

एनडीआरएफ, कन्नूर डिफेन्स सेक्युरिटी कोर र वायुसेनाका हेलिकप्टर उद्धार कार्यमा संलग्न छन्। तर वर्षाका कारण उद्धार कार्यमा कठिनाइ भइरहेको छ ।

मुख्यमन्त्री पिनाराई विजयनको कार्यालयले सेनालाई पहिरो स्थानमा पुग्न अस्थायी पुल निर्माण गर्न मद्दत गर्न आग्रह गरेको जनाएको छ। केही दिनयता केरलाका धेरै ठाउँमा भारी वर्षा भइरहेको छ । मुन्डक्काई, अट्टामाला र कुनहोम जस्ता क्षेत्रहरू पनि यी स्थानहरूमा समावेश छन्।