काठमाडौं । अमेरिकी विदेशमन्त्री एन्टोनी ब्लिन्केनले भेनेजुएलामा भएको निर्वाचनमा विपक्षी दलले जितेको पर्याप्त प्रमाण आफूहरूसँग रहेको बताएका छन् ।

राष्ट्रपति निकोलस मदुरो विजयी भएको घोषणा गरेपछि पनि अमेरिकी विदेशमन्त्री एन्टोनी ब्लिन्केनले विपक्षी नेता एडमन्डो गोन्जालेजले चुनाव जितेको र सबैभन्दा बढी मत प्राप्त गरेको बताएका छन्।

ब्लिन्केनले पर्याप्त प्रमाण देखेपछि अमेरिका र भेनेजुएलाका जनताले भेनेजुएलाको २८ औँ राष्ट्रपतिको निर्वाचनमा एडमन्डो गोन्जालेज उरुटियाले सबैभन्दा धेरै मतले विजयी भएको विश्वास गरेको बताएका छन् ।

उनको बयान यस्तो समयमा आएको हो जब आइतबार ब्राजिल, मेक्सिको र कोलम्बियाका राष्ट्रपतिहरूले भेनेजुएलालाई चुनावको पूर्ण तथ्याङ्क सार्वजनिक गर्न आग्रह गरेका थिए।

गत आइतबार सरकार नियन्त्रित निर्वाचन परिषद्ले राष्ट्रपति मादुरोले तेस्रो पटक राष्ट्रपति चुनाव जितेको घोषणा गरेको थियो।

यसपछि भेनेजुएलाको विपक्षी दलले ईभीएमबाट प्राप्त तथ्यांकका आधारमा यसलाई गलत भन्दै अस्वीकार गरेको थियो ।

विपक्षी दलले आफूहरूले मत गणना गरेको र ठूलो मतान्तरले चुनाव जितेको भन्न सकिने बताएको थियो । यसअघि राष्ट्रपति मदुरोले चुनावमा विदेशी शक्तिले हस्तक्षेप गर्न खोजेको आरोप लगाएका थिए ।

राष्ट्रपति मादुरोको विजयको घोषणा भएसँगै भेनेजुएलाको राजधानी काराकासमा व्यापक विरोध प्रदर्शन सुरु भएको छ ।