काठमाडौं । संयुक्त राष्ट्रसंघीय सङ्गठन युनिसेफले बंगलादेशमा आरक्षणको विरोधमा विद्यार्थी आन्दोलनका क्रममा धेरै बालबालिकाको मृत्यु भएको जनाएको छ ।

बालबालिकाका लागि काम गर्ने राष्ट्रसंघीय संस्था युनिसेफले बंगलादेशमा विद्यार्थी प्रदर्शनका क्रममा कम्तीमा ३२ बालबालिकाको मृत्यु भएको जनाएको छ ।

युनिसेफका प्रवक्ताका अनुसार मारिएका बालबालिकामध्ये एक पाँच वर्षका पनि थिएनन् । मारिएका अधिकांश मानिस प्रदर्शन हेरिरहेका थिए ।

बीबीसी बांग्लाले प्रमाणित गरेको तथ्यांकअनुसार बंगलादेशमा सरकारी जागिरमा आरक्षणको विरोधमा भएको प्रदर्शनका क्रममा मृत्यु भएका २०० जनामध्ये यी बालबालिका पनि पर्छन्।

दक्षिण एसियाका लागि युनिसेफका क्षेत्रीय निर्देशक सञ्जय विजेसेकेराले यस हप्ता बंगलादेशको भ्रमणका क्रममा बालबालिकालाई हिरासतमा राखेको विषयमा आफूलाई सचेत गराइएको बताउँछन्।

उनले संगठनले ३२ बालबालिकाको मृत्यु भएको पुष्टि गरेको बताए ।

संयुक्त राष्ट्र संघका प्रवक्ताले बताएअनुसार मृत्यु हुनेमा अधिकांश १३ वर्ष वा सोभन्दा माथिका थिए । एउटा बच्चा पाँच वर्ष मुनिको र एक बच्चा ६ देखि १२ वर्षको बीचको छ।

बंगलादेशका कनिष्ठ सूचना मन्त्री मोहम्मद अली अराफातले युनिसेफको दाबीबारे सरकारसँग कुनै जानकारी नभएको बताएका छन् ।

उनले युनिसेफले यो तथ्याङ्क कहाँबाट प्राप्त गरेको आफूलाई थाहा नभएको बीबीसीलाई बताए । उनले भने, ‘हाम्रो अडान प्रष्ट छ, जो कोही मर्यो छानबिन गरी दोषीलाई कारबाही गर्छौं ।’

विद्यार्थीहरुले आन्दोलनमा घाइते, मारिएका र गिरफ्तार भएकालाई न्यायको माग गरेका छन् ।