काठमाडौं । नदीमा पानी पिउन गएका एक किशोरलाई किनारमा लुकेको गोहीले समातेर तान्यो । करिब आधा घन्टा गोहीसँग लडेपछि अन्ततः ती किशोर ज्यान बचाएर जीवितै नदीबाट निस्किएका छन् । गोहीले किशोरीलाई तिघ्राको दुई ठाउँमा र हातमा एक ठाउँमा टोकेको छ । यो संघर्षमा किशोरको हात पनि भाँचियो । अहिले उनलाई उपचारका लागि अस्पताल भर्ना गरिएको छ ।

घटना भारतको मध्य प्रदेशको श्योपुर जिल्लाको रघुनाथपुर थाना क्षेत्रको पिपरानी गाउँमा भएको हो। आइतबार दिउँसो पिपरानी गाउँका १७ वर्षीय निहालसिंह राव सधैंझैँ भैँसी चराउन चम्बल खोलाको किनारमा गएका थिए ।

तिर्खा लागेपछि उनी पानी पिउन चम्बल नदीको किनारमा गए । किशोर चम्बलको किनारमा पानी पिइरहेका बेला त्यहाँ पहिलेदेखि नै पर्खिरहेको एउटा ठूलो गोहीले उनलाई तानेर पानीमा लगेको थियो ।

अचानक भएको घटना बुझ्न नसके पनि आत्तिएनन् र पानी भित्रको गोहीबाट बच्न संघर्ष गर्न थाले । गोहीसँग उनको संघर्ष करिब आधा घण्टासम्म चलेको थियो । यसैबीच नजिकैका गोठालाहरूले पनि उनलाई देखे। जो तुरुन्तै घटनास्थलमा पुगेर गोहीलाई लाठीले आक्रमण गर्न थाले र गोहीको मुखबाट किशोरलाई बचाए ।

गोहीले किशोरलाई तिघ्रामा र हातमा दुई ठाउँमा खतरनाक बङ्गाराले टोकेको छ। घटनापछि किशोरलाई उपचारका लागि जिल्ला अस्पतालमा भर्ना गरिएको थियो जहाँ उनको उपचार भइरहेको छ । घाइते किशोर निहालको अवस्था खतरामुक्त रहेको बताइएको छ ।

राष्ट्रिय चम्बल अभयारण्यका डेपुटी रेंजर फूलसिंह कोडियाले घटनाको जानकारी प्राप्त भएको बताए। उनले भने ‘हामीले गाउँलेलाई पहिले घाइते किशोरको उपचार गर्न भनेका छौं। साथै, यस घटनामा घाइतेहरूलाई सहयोग गरिनेछ।’