काठमाडौं । बंगलादेशको ठूला प्रहरी युनियनले देशका प्रत्येक प्रहरीको सुरक्षा सुनिश्चित नभएसम्म प्रहरी हडतालमा रहने बताएका छन् । बंगलादेश प्रहरीले आफूहरू प्रदर्शनकारीमाथि गोली चलाउन बाध्य भएको बताएको छ ।

देशको प्रहरी संगठन ‘बंगलादेश प्रहरी सेवा संघ’ वा बीपीएसएले नचाहे पनि आन्दोलनकारीमाथि गोली चलाउनुपरेको जनाएको छ । बिपीएसएले प्रहरीलाई जनतासामु खलनायकको रूपमा चित्रण गर्ने उच्च अधिकारीलाई जिम्मेवार ठहर गरेको छ ।

बंगलादेशमा हजारौं प्रहरीको संगठन बीपीएसएले भनेको छ, “देशले कानुन बनाउँछ र हामी त्यसलाई लागू मात्र गर्छौं। हामीले हाम्रा उच्च अधिकारीहरूको आदेश पालन गर्नुपर्छ, चाहे त्यो कानुनी होस् वा अवैध।”

शेख हसिनाले सोमबार राजीनामा दिएपछि देशभरका ४०० भन्दा बढी प्रहरी चौकीमा आक्रमण भएको प्रहरीले जनाएको छ । बंगलादेशमा भएको प्रदर्शनमा धेरै प्रहरीको पनि मृत्यु भएको छ ।

आफ्नो विज्ञप्तिमा निर्दोष विद्यार्थीमाथि भएको कारबाहीप्रति बीपीएसएले माफी मागेको छ ।