झापा। मेचीनगरमा नसर्ने रोगको जोखिम भएका ४० वर्षमाथिका उमेर समूहका बासिन्दाको मिर्गौला, उच्च रक्तचाप, मधुमेह, मुटु र फोक्सोसम्बन्धी रोगको, जाँच र जोखिम कम गर्न स्वास्थ्य कार्यक्रम सञ्चालन गरिने भएको छ ।

धरानस्थित बिपी कोइराला स्वास्थ्य विज्ञान प्रतिष्ठान, मिर्गौला, उच्च रक्तचाप, मधुमेह, मुटुरोग नियन्त्रणमा क्रियाशील सामुदायिक संस्था केएचडिसी नेपाल र मेचीनगर नगरपालिकाबीच स्वास्थ्य कार्यक्रम सञ्चालनका लागि बिहीबार त्रिपक्षीय सम्झौता भएको छ । सम्झौतापत्रमा मेचीनगर नगरपालिकाका तर्फबाट नगरप्रमुख गोपालचन्द्र बुढाथोकी, बिपी कोइराला स्वास्थ्य विज्ञान प्रतिष्ठानका उपकुलपति डा ज्ञानेन्द्र गिरी र केएचडिसी अध्यक्ष डा राजेन्द्रप्रसाद पोखरेलले हस्ताक्षर गरेका छन्।

केएचडिसी नेपालको कार्यक्रम संयोजक तथा बिपी कोइराला स्वास्थ्य विज्ञान प्रतिष्ठानका शिक्षाध्यक्ष शर्माले मेचीनगरका १५ वटै वडामा यो कार्यक्रम लागु हुने सम्झौतापत्रमा हस्ताक्षर गरेपछि बताए। कार्यक्रमअनुसार प्रतिष्ठान र केएचडिसी नेपालले मेचीनगरका घरघरमा पुगेर मुटुरोग, मधुमेह, उच्च रक्तचाप र दीर्घकालीन मिर्गौला रोगको उच्च जोखिम भएका बिरामी खोजेर स्थानीय स्वास्थ्यकर्मीलाई प्राविधिक उपकरण उपलब्ध गराउँदै सीप र क्षमता अभिवृद्धिमा सहयोग पुर्याउने छ ।

कार्यक्रमअन्तर्गतमा नगरका सबै अस्पताल, स्वास्थ्य केन्द्र, स्वास्थ्यचौकीमा कार्यरत जनशक्तिलाई तालिम दिएर प्रशिक्षित गरिने डा शर्माले बताउनुभयो । कार्यक्रमको संयोजन प्रतिष्ठानको इनटरनल मेडिसिन विभागका प्राध्यापक डा शर्माले गर्ने सम्झौतामा उल्लेख छ । नगर क्षेत्रमा घरदैलो गरेर फेला परेका नसर्ने रोगका बिरामीको विशेषज्ञ चिकित्सक र आवश्यकतानुसार टेलिमेडिसिनको माध्यमबाट उपचार गरिने छ ।

हाल केएचडीसीका स्वास्थ्य कार्यक्रम झापा, मोरङ, सुनसरी र धनकुटामा सञ्चालित छन्भने विगत तीन वर्षमा मेचीनगरका ४० वर्षमाथिका १० हजार आठ सय ५७ जनाको स्वास्थ्य परीक्षण गरिसकेको जनाएको छ ।