काठमाडौं । गुजरातमा भारी वर्षा र बाढीको स्थितिबीच सेना र उद्धार टोली राहत कार्यमा जुटेका छन्।

बिहीबार वायुसेनाको हेलिकप्टरको सहयोगमा द्वारकाको कल्याणपुरमा फसेका चार जनाको उद्धार गरिएको छ ।

बडोदराका तीन फरक ठाउँमा गोही देखिएका छन् । अकोटा क्षेत्रमा पानी भरिएपछि घरको छतमा गोही देखिएको छ ।

उता फतेहगञ्ज क्षेत्र नजिकै कामनाथ नगरमा १५ फिट लामो गोही देखियो । यहाँ एउटा गोही कालोनीको एक घरमा प्रवेश गरेको छ ।

समाचार एजेन्सी एएनआईका अनुसार बडोदराको महाराजा सयाजीराव विश्वविद्यालय क्याम्पसमा देखिएको गोहीलाई वन विभागको टोलीले उद्धार गरेको छ ।

यसअघि बिहीबार बिहान गुजरातका मुख्यमन्त्री भूपेन्द्र पटेलले प्रधानमन्त्री नरेन्द्र मोदीसँग कुरा गरेका थिए।

कुराकानीको जानकारी दिँदै भूपेन्द्र पटेलले एक्समा लेखे , “गुजरातमा विगत तीन दिनदेखि भारी वर्षा भइरहेको छ, प्रधानमन्त्री मोदीले आज बिहान मसँग टेलिफोनमा कुरा गरी अवस्थाबारे जानकारी लिनुभयो ।”

भूपेन्द्र पटेलले भने, “उहाँले राज्यका विभिन्न जिल्लाका प्रभावित मानिसहरूका लागि राहत उपायहरू बारे जान्नु भयो। बडोदराको विश्वामित्री नदीमा आएको बाढीप्रति चिन्ता व्यक्त गर्दै उहाँले प्रभावित मानिसहरूलाई दिइँदै आएको राहत र सहयोगको विवरण माग्नु भयो।”

“प्रधानमन्त्रीले बाढी प्रभावित क्षेत्रहरूमा सरसफाइ र सार्वजनिक स्वास्थ्य लगायतका विषयमा निर्देशन दिनुभयो र चाँडै सार्वजनिक जीवन पुनर्स्थापना गर्न केन्द्र सरकारबाट सबै सम्भव सहयोगको आश्वासन दिनुभयो।”