काठमाडौं । छत्तीसगढको दन्तेवाडा र बिजापुर जिल्लाको सीमा क्षेत्रमा मंगलबार सुरक्षा बलसँगको भिडन्तमा नौ जना कथित माओवादी मारिएका छन् ।

एक सीआरपीएफ अधिकारीका अनुसार मंगलबार सेप्टेम्बर ३ को बिहान जिल्ला रिजर्व गार्ड र केन्द्रीय रिजर्व सुरक्षा बलको संयुक्त टोली नक्सल विरोधी अभियानमा निस्किएको थियो।

दन्तेवाडा र बिजापुरको सीमा क्षेत्र लोहगाउँ पेडियाको जंगलमा बिहान करिब १०ः३० बजे मुठभेड सुरु भएको हो ।

यस विषयमा विस्तृत जानकारी दिँदै दन्तेवाडा जिल्लाका प्रहरी उपरीक्षक गौरव राईले भने, ‘सेप्टेम्बर २ मा पश्चिम बस्तर डिभिजन, दर्भा डिभिजन र किरन्दुल अन्तर्गत पर्ने एन्ड्रि, पुरङ्गलमा पीएलजीए कम्पनी नम्बर २ माओवादीहरू रहेको जानकारी आएको थियो। प्रहरी चौकीले जानकारी पाएपछि बस्तर फाइटर र सीआरपीएफको टोलीसँग संयुक्त अभियान चलाइएको थियो।

दन्तेवाडा प्रहरीले एक विज्ञप्तिमा भन्यो, “आज बिहान सेप्टेम्बर ३ मा सुरक्षा बलहरूले घेराबन्दी गर्दा माओवादीहरूबाट गोलीबारी सुरु भयो, जसको जवाफमा ९ वर्दीधारी माओवादीको मृत्यु भयो।”

घटनास्थलबाट ठूलो परिमाणमा एसएलआर, ३०३ राइफल र ३१५ बोर राइफल र अन्य हतियार र नक्सल सामग्री पनि बरामद भएको प्रहरीले जनाएको छ ।

जनवरी २०२४ देखि, छत्तीसगढमा सुरक्षा बलहरूसँगको भिडन्तमा १४० भन्दा बढी माओवादी मारिएका छन्।

जसमध्ये बस्तर डिभिजनमा १३० भन्दा बढी माओवादीको मृत्यु भएको छ ।