काठमाडौं । अन्तर्राष्ट्रिय स्टार सेलेना गोमेजले भर्खरै आफू कहिल्यै आमा बन्न नसक्ने खुलासा गरेकी छन् । सेलेनाका अनुसार यो खबरले उनलाई नराम्रोसँग दुखी बनायो, जसका कारण उनी धेरै दिनसम्म शोकमा थिइन् ।

भर्खरै भ्यानिटी फेयरलाई दिएको एक अन्तर्वार्तामा सेलेना गोमेजले भनिन्, ‘मैले यो पहिले भनेकी थिइनँ तर दुर्भाग्यवश मेरो आफ्नै सन्तान हुनेछैन । मसँग धेरै मेडिकल समस्याहरू छन् जसका कारण मेरो बच्चाको जीवन खतरामा पर्न सक्छ। यो कुराले मलाई लामो समयसम्म शोकमा राखेको छ।’

अन्तराष्ट्रिय गायिकाले आफुलाई सन्तान चाहिएको अवस्थामा सरोगेसी वा धर्मपुत्रको सहयोग लिने बताइन् । उनले भनिन्, ‘म राम्रो ठाउँमा छु । यो एक आशिष हो कि केहि अद्भुत व्यक्तिहरूले सरोगेसी र धर्मपुत्र रोज्छन्, यी मेरो लागि पनि ठूलो सम्भावनाहरू हुन्।’

अभिनेत्रीले थप भनिन्, ‘मलाई अब के हुन्छ भनेर म निकै उत्साहित छु । यो निश्चित रूपमा अलि फरक हुनेछ। अन्त्यमा मलाई केही फरक पर्दैन । तिनीहरू मेरा सन्तान हुनेछन्।’

बीबीसी रिपोर्टका अनुसार अभिनेत्रीलाई लुपस नामक गम्भीर रोग लागेको छ । २०१७ मा सेलेना गोमेजले लुपसको कारण मिर्गौला प्रत्यारोपण गर्नुपरेको थियो।

लुपस एक प्रकारको अटो इम्युनिटी रोग हो, जसमा शरीरको प्रतिरक्षा प्रणाली हाइपरएक्टिभ हुन्छ र सामान्य तन्तुहरूमा आक्रमण गर्न थाल्छ। यो रोग औषधि मार्फत व्यवस्थापन गर्न सकिन्छ।

सन् २०२२ मा रोलिङ स्टोनलाई दिएको अन्तर्वार्तामा सेलेना गोमेजले आफूलाई बाइपोलर डिसअर्डर भएको बताएकी थिइन् । उनले सुरक्षित गर्भधारण हुन नसके पनि बाइपोलर डिसअर्डरको उपचार पक्कै गराउने बताइन् ।

अन्तर्राष्ट्रिय स्टार सेलेना गोमेजले एक पटक अन्तर्राष्ट्रिय पप स्टार जस्टिन बीबर र निक जोनासलाई डेट गरिन्। डिसेम्बर २०२३ मा सेलेनाले अमेरिकी रेकर्ड निर्माता बेनी ब्लान्कोसँग आफ्नो सम्बन्ध पुष्टि गरिन्।

सेलेना गोमेज चाँडै टिभी सिरिज विजार्ड्स बियन्ड वेभरली प्लेसमा देखिने छिन् । शो अक्टोबर २९ मा प्रिमियर हुनेछ। हालै सेलेनाको नाम विश्वकै कान्छी अर्बपतिको सूचीमा परेको छ ।