काठमाडौं । लेबनानमा मङ्गलबार पेजर मेसिनबाट गराइएको विष्फोटमा इरानका राजदूतसहित २ हजार ८ सयभन्दा बढी व्यक्ति घाइते भएका छन् ।

लेबनानका स्वास्थ्य मन्त्रीका अनुसार यी विष्फोटमा एक बालकसहित अहिलेसम्म नौ जनाको मृत्यु भएको छ ।

लेबनानको राजधानी बेरुतलगायत अन्य धेरै ठाउँमा पनि यी विस्फोटहरू भएका थिए। इरान समर्थित समुह हिजबुल्लाहले यी विष्फोटहरूमा यी पेजरहरू उनीहरूकै भएको र उनीहरूका आठ लडाकु मारिएको बताएको छ।

इरानी राजदूतकी पत्नी मोजतबा अमानीले आफ्ना श्रीमानलाई सामान्य चोट लागेको र अस्पतालमा रहेको बताएकी छन् ।

समाचार एजेन्सी एएफपीका अनुसार हिजबुल्लाहका सांसद अली आमेर र उनीहरूका एक सदस्यकी १० वर्षीया छोरीको पनि यी विस्फोटमा मृत्यु भएको छ।

हिजबुल्लाहले इजरायललाई यी विष्फोटका लागि जिम्मेवार ठहर गर्दै यसलाई आपराधिक घटना भनेको छ।

हिजबुल्लाहले पनि जवाफ दिने बताएको छ। इजरायली सेनाले अहिलेसम्म उसको कुनै पनि दाबीमा टिप्पणी गरेको छैन।

गत अक्टोबर ७ मा गाजामा इजरायल र हमासबीच युद्ध सुरु भएदेखि इजरायल र लेबनानबीचको सीमामा झण्डै दिनहुँ गोली हानाहान भइरहेको छ ।

लेबनानमा भर्खरको विस्फोट हुनुभन्दा केही घण्टा अघि, इजरायलको सुरक्षा मन्त्रिपरिषद्ले भन्यो कि यस युद्धमा यसको आधिकारिक लक्ष्य देशको उत्तरी भागमा हिजबुल्लाहका आक्रमणहरू रोक्न र विस्थापित नागरिकहरूको सुरक्षित फिर्ता गर्नु हो।