काठमाडौं । इजरायलको मिलिटरी इन्टेलिजेन्सले हमास नेता याह्या सिनवारको मृत्यु भएको दाबी गरेको छ । टाइम्स अफ इजरायलका अनुसार सिनवार केही समयदेखि बेपत्ता छन् । उनको कसैसँग पनि सम्पर्क भएको छैन ।

यस्तो अवस्थामा इजरायली सेनाले गाजामा भएको आक्रमणमा सिनवार मारिएको हुनसक्ने सम्भावनाको अनुसन्धान गरिरहेको छ । सिनवारको मृत्युबारे अहिलेसम्म कुनै प्रमाण फेला परेको छैन । यद्यपि, धेरै ठूला इजरायली मिडिया हाउसका रिपोर्टहरूले हमास नेताको मृत्युको बारेमा अनुमान लगाएका छन्।

इजरायल डिफेन्स फोर्स (आईडीएफ)का अनुसार उनीहरूले केही दिनअघि गाजाको एउटा विद्यालयमा आक्रमण गरेका थिए। हमासको कमाण्ड सेन्टर त्यहाँ थियो। यस आक्रमणमा २२ जनाको मृत्यु भएको थियो । यस्तो अवस्थामा यस हवाई आक्रमणमा सिनवारको पनि मृत्यु भएको आशंका गरिएको छ ।

इजरायली मिडिया हारेट्जका अनुसार इजरायलले हालै गाजाका सुरुङहरूमा आक्रमण गरेको छ जहाँ सिनवार लुकेका थिए। तर, अहिलेसम्म आक्रमणमा सिनवारको मृत्युको सम्बन्धमा कुनै सुराग फेला परेको छैन ।

सिनवार अचानक बेपत्ता भएको यो पहिलो पटक भने होइन । यसअघि पनि पटकपटक सिनवार केही समय बेपत्ता भएर युद्धविराम वा अन्य सन्देश लिएर फर्किसकेका छन् । अर्कोतर्फ, इजरायलको आन्तरिक सुरक्षा एजेन्सी शिन बेटले सिनवारको मृत्युको अनुमानलाई अस्वीकार गरेको छ।

गएको जुलाई ३१ मा इरानमा हमासका राजनैतिक प्रमुख इस्माइल हानियाको मृत्यु भएपछि सिनवार संगठनको नयाँ प्रमुख बनेका थिए । उनी संगठनको प्रमुख बनेको डेढ महिनामै उनको मृत्यु भएको दाबी गरिएको हो ।

संगठन प्रमुख इस्माइल हानियासँगै हमासका सैन्य प्रमुख मोहम्मद दाइफ पनि जुलाई १३ मा एक हवाई आक्रमणमा मारिएका थिए । यस्तो अवस्थामा अब हमासको शीर्ष नेतृत्वमा सिनवार मात्र बाँकी छन् । त्यसकारण, यस समयमा इजरायलको सम्पूर्ण ध्यान सिनवारलाई फेला पार्न र उसलाई मार्नमा केन्द्रित छ।

उनी इजरायलका सबैभन्दा खोजिएका व्यक्तिहरूमध्ये एक हुन्। ६१ वर्षीय याह्या सिनवारलाई मानिसहरू अबु इब्राहिमको नामले पनि चिन्छन्। उनको जन्म गाजा पट्टीको दक्षिणी क्षेत्रमा रहेको खान युनिस शरणार्थी शिविरमा भएको थियो।

याह्याका आमाबाबु अस्केलोनका थिए तर जब इजरायल १९४८ मा स्थापना भयो र हजारौं प्यालेस्टिनीहरूलाई उनीहरूको पुर्ख्यौली थलोबाट निष्कासित गरियो, याह्याका आमाबाबु पनि शरणार्थी भए। प्यालेस्टाइनीहरूले यसलाई ‘अल-नकबा’ अर्थात् विनाशको दिन भन्ने गर्छन्।

बीबीसीका अनुसार याह्या सिनवारलाई इजरायलले सन् १९८२ मा पहिलो पटक पक्राउ गरेको थियो । त्यतिबेला उनको उमेर १९ वर्ष थियो । याह्यालाई ‘इस्लामिक गतिविधि’ मा संलग्न भएको आरोप लागेको थियो । सन् १९८५ मा उनी फेरि पक्राउ परे ।

यही समयमा याह्याले हमासका संस्थापक शेख अहमद यासिनको विश्वास जितेका थिए। सन् १९८७ मा हमासको स्थापना भएको दुई वर्षपछि याह्याले आफ्नो कुख्यात खतरनाक आन्तरिक सुरक्षा संगठन अल-मजदको स्थापना गरे। सिनवार त्यतिबेला २५ वर्षका थिए ।