काठमाडौं । इजरायल र हिजबुल्लाहबीचको द्वन्द्वका कारण ७० हजारभन्दा बढी विस्थापित व्यक्तिहरू पाँच सयभन्दा बढी शरणार्थी शिविरमा बस्दै आएका लेबनानका आन्तरिक मामिला मन्त्री बसम मावलावीले बेरुतमा पत्रकारहरूलाई बताएका छन् ।

संयुक्त राष्ट्रसंघले सोमबारदेखि लेबनानमा ९० हजारभन्दा बढी मानिस विस्थापित भएको अनुमान गरेको छ ।

लेबनानका आन्तरिक मन्त्री बसम मावलावीले विगत तीन दिनमा करिब २७ हजार मानिस लेबनानबाट भागेको बताए । यो संख्यामा कम्तीमा आधा सिरियाली नागरिक छन् जो आधिकारिक सीमा पार गरेर आफ्नो देश फर्किरहेका छन्।

लेबनानको जनसंख्यामा लगभग १.५ मिलियन विस्थापित सिरियाली नागरिकहरू छन्। संयुक्त राष्ट्रसंघका अनुसार विश्वमा प्रति वर्ग किलोमिटरमा सबैभन्दा धेरै शरणार्थी लेबनानमा छन्।

यसैबीच, इजरायली रक्षा बल (आईडीएफ) ले बेरुतको दक्षिणी क्षेत्रमा गरेको आक्रमणमा हिजबुल्लाहको वायुसेना इकाईका प्रमुख मारिएको जनाएको छ।

“लडकू विमानहरूले बेरुतमा आक्रमण गरे र मोहम्मद हुसेन सुरूरलाई मारे,” आइडीएफ ले सोशल मिडियामा लेख्यो।

आइडीएफका अनुसार सुरुर सन् १९८० को दशकमा हिजबुल्लाहमा सामेल भएका थिए र इजरायलमा भएका धेरै ड्रोन आक्रमणमा महत्वपूर्ण भूमिका खेलेका थिए।