काठमाडौं । कमला ह्यारिसका रनिङ मेट र डेमोक्र्याटिक उपराष्ट्रपति पदका उम्मेदवार टिम वाल्जको सन् १९८९ मा चीनमा पढाउने क्रममा चिनियाँ कम्युनिष्ट पार्टीका शीर्ष अधिकारीकी छोरीसँग सम्बन्ध रहेको एक रिपोर्टमा दावी गरिएको छ ।

डेली मेलको रिपोर्टका अनुसार ५९ वर्षीया जेना वाङले वाल्जसँगको अफेयरले उनलाई विचलित बनाएको र आत्महत्या गर्ने अवस्थामा पुर्याएको बताएकी छन् । यो खुलासा नोभेम्बर ५ मा हुन लागेको अमेरिकी राष्ट्रपति चुनावको केही दिन अघि आएको हो, जहाँ ह्यारिस रिपब्लिकन डोनाल्ड ट्रम्पको सामना गर्दैछिन्।

यो खुलासा यस्तो समयमा आएको छ जब वाल्जले १९८९ तियानमेन स्क्वायर नरसंहारको क्रममा आफू हङकङमा रहेको झूटो दाबी गरेकोमा आलोचनाको सामना गर्नु परेको छ। वाल्जले संयुक्त राज्य अमेरिकामा सर्नु र राजनीतिमा प्रवेश गर्नु अघि चीनको गुआंगडोङ प्रान्तको फोशानमा हाईस्कूल अंग्रेजी शिक्षकको रूपमा काम गरेका थिए ।

उनी अहिले मिनेसोटाका गभर्नर छन्। डेली मेलसँगको अन्तर्वार्तामा वाङले बताएअनुसार वाल्जसँग उनको पहिलो कुराकानी आफ्नो उच्चारण सुधार गर्न वाल्जको एउटा व्याख्यानमा भाग लिने क्रममा भएको थियो । उनले वाल्जले आफ्नो हेडफोन हटाएर कानमा ‘तिमी धेरै सुन्दर छौ’ भनेको दाबी गरिन्। चाँडै दुवै बाहिर भेट्न थाले।

वाङले दाबी गरेअनुसार उनीहरूको सम्बन्ध गोप्य रूपमा सुरु भयो किनकि उनका बुबाले पश्चिमीसँगको उनको सम्बन्धलाई कहिल्यै स्वीकार गर्ने थिएनन्। त्यतिबेलाको भावुक सम्बन्धले २४ वर्षीय वाङलाई अमेरिकामा विवाह र नयाँ जीवनको सपना देख्न प्रेरित गर्‍यो। वाङले भनिन्, ‘टिम वाल्ज धेरै भावुक र धेरै रोमान्टिक थिए।’

यद्यपि, उनले वाल्जबाट कहिल्यै विवाहको प्रस्ताव नआएको दाबी गरिन्। वाङका अनुसार लगत्तै वाल्जले उनलाई आफूलाई माध्यम बनाएर अमेरिकाको भिसा लिन चाहेको आरोप लगाए र उनीहरूबीर यस विषयमा विवाद हुन थाल्यो । यो व्यवहारले आफुलाई दुख दिएको र आत्महत्या गर्ने अवस्थामा पुर्याएको उनले बताइन् । यो दुर्भाग्यपूर्ण प्रेम सम्बन्धको कारण वाङ चीनबाट भागेर इटाली गइन् ।

वाङले वाल्जले आफूलाई वेश्याजस्तै व्यवहार गरेको बताएकी छन् । वाल्जले संयुक्त राज्य अमेरिका फर्केपछि १९९३ मा ग्वेन ह्विपलसँग विवाह गरे। उनीहरुका दुई सन्तान छन् । वाल्ज अहिले डेमोक्रेटिक उपराष्ट्रपति पदका उम्मेदवार भए पनि वाङले वाल्जमा “विश्वको सबैभन्दा महत्त्वपूर्ण काम गर्न सक्ने चरित्र र निष्ठा नभएको” बताएकी छिन् ।