चितवन। जिल्लाका विभिन्न अस्पतालमा उपचारका लागि आएका बिरामीमध्ये छ सय छ जनामा स्क्रब टाइफसको संक्रमण देखिएको छ। जनस्वास्थ्य कार्यालय चितवनका अनुसार साउनयता तीन हजार दुई सय १७ जनामा परीक्षण गर्दा सो संख्यामा संक्रमण पुष्टि भएको हो।

कार्यालयका जनस्वास्थ्य अधिकृत बिमल पटेलका अनुसार संक्रमितमध्ये तीन सय छजना चितवनका हुन् भने तीन सयजना जिल्ला बाहिरका रहेका छन्। जिल्लामा संक्रमितमध्ये सबैभन्दा धेरै भरतपुर महानगरपालिकाका एक सय ४६ जना र सबैभन्दा कम माडी नगरपालिकाका आठजना रहेका छन्।

यस्तै रत्ननगर नगरपालिकाका ४५ जना, खैरहनी नगरपालिकाका ३० जना, राप्ती र कालिका नगरपालिकाका २७/२७ जना र इच्छाकामना गाउँपालिकाका २३ जना रहेका छन्। संक्रमितमध्ये एक जनाको मृत्यु भएको छ। साउनयता आएका बिरामीमध्ये तीन हजार दुई सय ८० जनामा डेंगीको संक्रमण पुष्टि भएको छ। १० हजार ५७३ जनाको परीक्षणका क्रममा उनीहरूमा डेंगीको संक्रमण पुष्टि भएको हो।

जसमध्ये दुई हजार पाँच सय २० जना चितवनका रहेका छन् भने सात सय ६० जना जिल्ला बाहिरका रहेका छन्। जिल्लामा संक्रमितमध्ये दुई जनाको मृत्यु भएको छ।