काठमाडौं । आजभोली सहकारी पीडित दिनहुँ जसो देशका विभिन्न भूभागमा न्यायको माग गर्दै प्रदर्शन गरिरहेका भेटिन्छन्। दु:ख गरेर थोरै थोरै गर्दै सहकारीमा जम्मा गरेको रकम ठगहरूले झ्वाम पारिदिएपछि न्याएको माग गर्दै उनीहरू सडक आन्दोलनको सहारा लिन बाध्य बनेका हुन्।

बुधबार दिउँसो काठमाडौंको माइतीघरमा पनि त्यस्तै दृष्य देखियो। न्याय नपाएकाहरू आफ्नो आवाज छेवैमा रहेको सिंहदरबारसम्म पुर्‍याउन माइतीघरमै आन्दोलनको सहारा लिने गर्छन्।

बुधबार मध्यान्न थापाथलीबाट न्याएको माग गर्द सहकारी पीडित माइतीघरतर्फ नाराबाजीसहित आइरहेका थिए।

जुलुसलाई प्रहरीले नेपाली सेनाको मुख्यालय प्रवेश गर्ने गेट नजिकै रोक्यो। आक्रोसित भीड सम्हालिने मुडमै थिएन। उनीहरू प्रहरीको घेरा तोडेर अगाडि बढ्न खोजे। स्थिति तनावग्रस्त बन्यो।

प्रदर्शनकारीलाई बानेश्वरतर्फ अघि बढ्न रोक्न खोजेपछि उनहरूले प्रहरीमाथि ढुंगामुडा प्रहार गरे। प्रहरीले प्रतिकार गर्दै लाठीचार्ज गर्‍यो। र, त्यस क्रममा तीन जना प्रदर्शनकारी घाइते भए।

प्रहरीको लाठीचार्जबाट एक जनाको टाउको फुटेको छ। निषेधित क्षेत्रमा प्रवेश गर्न लागेपछि प्रहरीले बल प्रयोग गर्नुपरेको जनाएको छ।

सहकारी बचतकर्ता संरक्षण राष्ट्रिय अभियान (महासंघ)को अगुवाइमा उनीहरुले आज विभिन्न ठाउँमा प्रदर्शन गरेका थिए।

गठ्ठाघर चोक, चावाहिल चोक, पुल्चोक ललितपुर, कालिमाटी र सोहखुट्टे चोकबाट सहकारी पीडितले प्रदर्शन गरेर माइतीघरमा भेला भएका थिए। उनहरूले आफूहरूको डुबेको रकम फिर्ताको माग गरिरहेका हुन्