काठमाडौं । अमेरिकी राष्ट्रपति चुनावमा डोनाल्ड ट्रम्पले कमला ह्यारिसलाई पराजित गरेका छन् । उनी देशको आगामी राष्ट्रपतिको सपथ लिन तयार छन् । यो निर्वाचनमा अर्को पनि इतिहास रचिएको छ । पहिलो पटक तेस्रोलिङ्गी उम्मेदवार सांसद चुनिएकी छिन् । तर उनको लैंगिकताले नयाँ विवादलाई जन्म दिएको छ ।

डेमोक्र्याट सारा म्याकब्राइड नामकी एक ट्रान्सजेन्डर महिला पहिलो पटक अमेरिकी संसदमा पुगेकी छन् । सारा पुरुषका रूपमा जन्मेकी थिइन् तर अहिले उनी ट्रान्सजेन्डर महिला भइन् । उनी डेलावेयरबाट संसदको तल्लो सदन हाउस अफ रिप्रिजेन्टेटिभमा निर्वाचित भएकी हुन् ।

रिपब्लिकन पार्टीकी सांसद न्यान्सी मेसले सारा म्याकब्राइडले संसदमा महिला शौचालय प्रयोग गरेकोमा आपत्ति जनाएकी थिइन् । उनले सारालाई महिला शौचालय प्रयोग गर्न नदिने बताएकी थिइन् ।

न्यान्सी मेसले अमेरिकी तल्लो सदन हाउस अफ रिप्रिजेन्टेटिभमा पनि यस सम्बन्धमा प्रस्ताव ल्याएकी छिन् । दुई पृष्ठको यो प्रस्तावमा संसदका सदस्य, संसदका पदाधिकारी र कर्मचारीले आफ्नो मौलिक लिंग (उनी जन्मेको लिंग) बाहेक अन्य शौचालय प्रयोग गर्न नपाउने व्यवस्था छ।

यो प्रस्तावमा महिलाको शौचालय, लकर रुम र चेन्जिङ रुममा पुरुषका रूपमा जन्मिएका व्यक्तिलाई अनुमति दिँदा महिलाको सुरक्षा र मर्यादामा आँच आउन सक्ने उल्लेख छ । उनले सारा म्याकब्राइड पुरुषको रूपमा जन्मिएको हुँदा उनलाई यो अनुमति दिन नसकिने बताइन् ।

यस सम्पूर्ण विषयमा साराले यो वास्तविक मुद्दाबाट ध्यान हटाउन दक्षिणपन्थी नेताहरूको षड्यन्त्र भएको बताइन् । अमेरिकी नागरिकहरूले दिनहुँ सामना गरिरहेका समस्याहरूको तिनीहरूसँग कुनै समाधान नभएको उनले बताइन् ।

अमेरिकी तल्लो सदनका सभामुख माइक जोन्सनले संसदमा तेस्रोलिङ्गी महिलालाई महिला शौचालय प्रयोग गर्न प्रतिबन्ध लगाउने योजनालाई समर्थन गरेका छन्। जोनसनले विज्ञप्तिमा महिलाका लागि स्पेस निकै महत्त्वपूर्ण रहेको बताएका छन् । यो प्रतिबन्ध क्यापिटल हिल र संसदसँग सम्बन्धित भवनमा कायम रहनेछ ।