काठमाडौं । प्रधानमन्त्री केपी शर्मा ओलीको चीन भ्रमणको तालिका सार्वजनिक भएको छ।

बिहीबार बसेको मन्त्रिपरिषद् बैठकले यही मंसिर १७ गतेदेखि २० गतेसम्म हुने प्रधानमन्त्रीको चीन भ्रमण स्वीकृत गरेसँगै परराष्ट्र मन्त्रालयले भ्रमण तालिका सार्वजनिक गरेको हो।

भ्रमणका क्रममा प्रधानमन्त्री ओलीले १८ गते चिनियाँ राष्ट्रपति सि जिनपिङ र समकक्षी लिसँग भेटवार्ता गर्नेछन्। उनले चिनियाँ जनकांग्रेसका स्थायी समिति अध्यक्ष चाओ लेजीसँग पनि भेटघाट गर्ने कार्यसूची छ।

उनले नेपाल–चीन व्यापार मञ्चलाई पनि सम्बोधन गर्ने कार्यक्रम छ। उनले बेइजिङमा रहेको पेकिङ विश्वविद्यालयमा प्रमुख वक्ताका रुपमा सम्बोधन गर्ने कार्यतालिका समेत रहेको छ।

प्रधानमन्त्री ओलीसँगै परराष्ट्रमन्त्री आरजु राणा देउवा, प्रधानमन्त्रीको श्रीमती राधिका शाक्य, प्रधानमन्त्रीका प्रमुख सल्लाहकार विष्णु रिमाल, आर्थिक तथा विकास सल्लाहकार युवराज खतिवडा, सांसदहरू र उच्च पदस्थ सरकारी अधिकारीहरू चीन जाने कार्यक्रम छ।

८७ सदस्यीय प्रधानमन्त्रीको भ्रमण टोलीमा ३२ जना सरकारी अधिकारी रहेका छन्।