काठमाडौं । बेलायतस्थित अनुगमन समूह सिरिया अब्जर्भेटरी फर ह्युमन राइट्स (एसओएचआर)का अनुसार सिरियाका विद्रोही समूहले देशको दोस्रो ठूलो सहर अलेप्पोको अधिकांश भाग कब्जा गरेको छ।

यसको जवाफमा रुसले अब अलेप्पोका केही क्षेत्रमा हवाई आक्रमण सुरु गरेको छ । सन् २०१६ यता रुसले अलेप्पोका केही भागमा हवाई हमला गरेको यो पहिलो पटक हो।

सिरियाली राष्ट्रपति बसर अल-असदको सरकारका समर्थकहरू सरकारी सेना अलेप्पोबाट पछि हटेको भन्दै आक्रोशित छन्।

यसैबीच, इरानका विदेशमन्त्री अब्बास अराक्ची र रुसका विदेशमन्त्री सर्गेई लाभरोभबीच शनिबार विद्रोहीले अलेप्पो कब्जा गरेको विषयमा फोन वार्ता गरेका छन् ।

उनले यस कब्जाको विरुद्धमा सिरियाली सरकारलाई आफ्नो समर्थन दिएका छन्। “हामीले एलेप्पोको मुद्दामा रसिया, इरान र टर्कीबीच समन्वयको बारेमा कुरा गरेका छौं,” इरानका विदेशमन्त्रीले टेलिग्राममा एक पोस्टमा भने।

रुसको विदेश मन्त्रालयले वार्तामा भन्यो, “दुवै पक्षले सिरियामा विकास भइरहेको अवस्थाका बारेमा गम्भीर छलफल गरेका थिए र आपसी कारबाहीमा सहमत भएका थिए।”

सिरियाको विद्रोही समूहले देशको दोस्रो ठूलो सहर अलेप्पोका धेरै क्षेत्र आफ्नो नियन्त्रणमा लिएको छ ।