काठमाडौं। आइतबार भएको स्थानीय तह उपनिर्वाचनको मत परिणाम आउनेक्रम जारी छ। हालसम्म ३७ स्थानको मत परिणाम सार्वजनिक भइसकेको छ। काठमाडौंको कीर्तिपुर नगरपालिको मेयरको मत गणना जारी छ।

सोमबार मध्यान्न १२ बजेसम्मको परिणामअनुसार नेपाली कांग्रेसका उम्मेदवार कृष्णमान डंगोलले अग्रता कायमै राखेका छन्। कांग्रेसका डंगोलले अहिलेसम्म १८९२ मत ल्याएका छन्। यहाँ नेकपा एमालेका उम्मेदवार सुरेन्द्र मानन्धरले कांग्रेसलाई पछ्याइरहेका छन्। मानन्धरले १३७८ मत ल्याएका छन्। मानन्धर र डंगोबीचको मतान्तर ५१४ रहेको छ।

नेकपा माओवादी केन्द्रका शिवशरण महर्जनले ११८८ मत ल्याएका छन् भने राप्रपाका उम्मेदवार ध्रुव महर्जनले २९५ मत ल्याएका छन्।

स्वतन्त्र उम्मेदवार राजमान मानवले ७३६ मत ल्याएका छन्। उनी धरानका मेयर हर्क साम्पाङले समर्थन गरेका उम्मेदवार हुन्। त्यस्तै स्वतन्त्र नै उठेका दिनेश कुमार अधिकारीले ६४२ मत ल्याएका छन्। आइतबार भएको मतदानमा कीर्तिपुरमा २१ हजार ३ सय मत खसेको थियो।