मुम्बई । अग्रिम बुकिङमा पुष्पा २ ले निरन्तर राम्रो प्रतिक्रिया पाइरहेको छ ।

अल्लु अर्जुनको पुष्पा २ ले बाहुबली, केजीएफ, कल्की २८९८ एडी, पठान, जवान र आरआरआर जस्ता धेरै फिल्मलाई अग्रिम बुकिङको सबालमा पछाडि छोडेको छ। पुष्पा २ सन् २०२४ को सबैभन्दा ठूलो ओपनिङतर्फ अघि बढिरहेको छ ।

यसैबीच अल्लु अर्जुनको फिल्म थ्रीडीमा पर्खिरहेका फ्यानहरूका लागि नराम्रो खबर आएको छ । पुष्प २ थ्रीडी संस्करणमा हलमा रिलिज हुने छैन । थ्रीडी संस्करणका लागि दर्शकले करिब एक साता कुर्नु पर्ने भएको छ ।

अङ्ग्रेजी वेबसाइट बलिउड हंगामाको समाचार अनुसार पुष्पा २ को थ्रीडी संस्करण अझै तयार भएको छैन । त्यसैले फिल्मका निर्माताले यो साता फिल्मलाई थ्रीडीमा रिलिज नगर्ने निर्णय गरेका छन् । फलस्वरूप, डिसेम्बर ५ मा फिल्म देश र विश्वका विभिन्न भाषाहरूमा टु डी संस्करणमा मात्र देखाइने छ।

निर्माताहरूले अब आगामी शुक्रबार अर्थात् डिसेम्बर १३ मा मात्र थ्रीडी संस्करण रिलिज गर्ने निर्णय गरेका छन् । त्यतिन्जेल थ्रीडी प्रिन्टहरू तयार हुनेछन्। यद्यपी यसबारेमा पुष्प–२ का निर्माण पक्षबाट अहिलेसम्म कुनै आधिकारिक धारणा आएको छैन ।

रिपोर्टलाई विश्वास गर्ने हो भने पुष्पा २ को बजेट करिब ५ सय करोड छ । यो फिल्मको सिक्वेल सन् २०२१ मा आएको थियो र यो १५० करोडको बजेटमा बनेको थियो । फिल्मले विश्वभर ३५० करोड कलेक्सन गरेको थियो ।

पुष्पा २ लाई सुकुमारले निर्देशन गरेका हुन् । अल्लु अर्जुन र रश्मिकासँगै फहद फासिल महत्वपूर्ण भूमिकामा देखिने छन् । पहिलो फिल्म ‘पुष्पाः द राइज’ ले अल्लु अर्जुनले निर्वाह गरेको पुष्पाको निडर र उग्र चरित्रको परिचय दर्शकलाई गराएको थियो । अब पुष्प २ः द रुलको कथाले नयाँ उचाइमा पुग्नेछ ।