काठमाडौं । रकस्टार, मद्रास क्याफे, हाउसफुल ३ जस्ता उत्कृष्ट फिल्ममा देखिएकी अभिनेत्री तथा अमेरिकी फेसन मोडल नरगिस फाखरीकी बहिनी आलिया फाखरीमाथि दोहोरो हत्याको आरोप लागेको छ । आलिया आफ्ना पूर्व प्रेमी र साथीलाई जलाएर मारेको आरोपमा न्यूयोर्कबाट पक्राउ परेकी छन् ।

रिपोर्टका अनुसार हत्याकी आरोपी आलिया र नरगिस फाखरी विगत २० वर्षदेखि सम्पर्कमा थिएनन् । यस विषयमा नरगिसको तर्फबाट अहिलेसम्म कुनै आधिकारिक बयान आएको छैन भने उनकी आमा मेरीले छोरी आलियाको पक्षमा बयान दिएकी छिन् । उनले आफ्नी छोरीले सबैको ख्याल गरेको र कसैलाई मार्न नसक्ने बताइन् ।

नरगिस धेरै वर्षदेखि हिन्दी सिनेमासँग जोडिएकी छिन् र विरलै अवसरमा उनी न्यूयोर्कको क्वीन्स जान्छिन्, जहाँबाट उनकी बहिनीलाई पक्राउ गरिएको छ । नर्गिस फखरीको जन्म क्वीन्समा भएको थियो ।

उनका बुबा मोहम्मद फाखरी पाकिस्तानी थिए भने आमा मेरी चेक थिइन्। नर्गिस आलियाभन्दा जेठी छिन् । आमाबाबुको सम्बन्धविच्छेद हुँदा उनीहरू दुवै सानै थिए। सम्बन्धविच्छेद भएको केही वर्षमै उनका बुबाको निधन भयो ।

आलियाको गिरफ्तारीको खबर बाहिर आएको केही घण्टापछि नरगिस फाखरीले आफ्नो आधिकारिक इन्स्टाग्राम अकाउन्टबाट एक पोस्ट सेयर गरेकी छिन्, जसमा उनी आफ्नो आगामी फिल्म हाउसफुल ५ को सेटमा रमाइलो गरिरहेको देखिएकी छिन् ।

नोभेम्बर २६ मा नर्गिसकी बहिनी आलियालाई न्यूयोर्कको क्वीन्सबाट पक्राउ गरिएको थियो । उनीमाथि आफ्ना पूर्व प्रेमी ३५ वर्षीय एडवर्ड जेकब्स र ३३ वर्षीया साथी अनास्तासिया स्टार इटिनेको दुई तले ग्यारेजमा आगो लगाएर हत्या गरेको आरोप छ।

प्रत्यक्षदर्शीका अनुसार एडवर्ड र अनास्तासिया ग्यारेजमा सुतिरहेका बेला आलिया ग्यारेजबाहिर आएर होहल्ला गर्न थालिन् । उनी ग्यारेजबाहिर उभिएर ‘तिमीहरू सबै जिउँदै जल्नेछौ’ भन्दै कराइरहेकी थिइन्, त्यसको केही समयपछि ग्यारेजमा आगलागी हुँदा दुवैको मृत्यु भएको थियो ।

एक वर्षअघि आलियाको एडवर्ड जेकब्ससँग अफेयर भएको खुलासा भएको छ । एडवर्ड पेशाले प्लम्बर थिए र तिनका तीन छोराछोरी थिए। एडवर्ड त्यो ग्यारेजमा बस्दै थिए र यसलाई अपार्टमेन्टमा रूपान्तरण गर्ने काम गर्दै थिए।

आलिया फाखरीमाथि फर्स्ट डिग्री र थर्ड डिग्री मर्डरको ४ वटा धारा लगाइएको छ । आरोप प्रमाणित भए आलियालाई आजीवन कारावास हुन सक्छ । यस मुद्दाको अर्को सुनुवाईका लागि आलियालाई डिसेम्बर ९ मा अदालतमा पेश गरिने छ ।