झापा। शिलान्यास भएलगत्तै विभिन्न नाम र उपनामले चर्चा कमाएको दमक व्यापारिक कम्प्लेक्सको औपचारिक समोद्घाटन सम्मानीय प्रधानमन्त्री केपी शर्मा ओलीले गरेका छन्।

सरकारको प्रधानमन्त्री नै स्वयं छिमेकी पालिकामा आउने पक्कापक्की भएपछि विभिन्न शीर्षकका कामको सहज व्यवस्थापन गर्दै कार्यस्थलतिर जान लागेका कानेपोखरी गापाका उपाध्यक्ष भोलाप्रसाद अधिकारीको सहयोगमा समोद्घाटन समारोहमा सहभागी हुने सुनौलो औसर मिल्यो। दाजु पार्थबहादुर बुढाथोकी, दानबहादुर बस्नेत र हरिप्रसाद अधिकारीसँगको सहयात्रा निकै रमणीय थियो ।

गिज्याउने, खिसिट्युरी गर्ने र परस्पर तेजोबध गर्न उद्यत रहनेले विषयवस्तुलाई जे-जसरी उछाले पनि, सकारात्मक सोच र सोचसञ्चार अभावमा छुद्र र खुद्रा तर्क गरिएका कारण जे-जे कुरा सुने पनि यो व्यापारिक कम्प्लेक्सले संघीय सरकारको तर्फबाट हामी कोशीबासीले उपहारस्वरुप पाएको यो अमूल्य सम्पदा भएको कानेपोखरी गापाका उपाध्यक्ष भोलाप्रसाद अधिकारी बताउँछन्।

यस्तै उक्त उद्घाटन समारोहमा पुगेका पार्थबहादुर बुढाथोकी, दानबहादुर बस्नेत र हरिप्रसाद अधिकारी पनि झापाको दमकका लागि नभएर समयक्रममा हाम्रो परिचय बटुल्ने, कमाउने र जमाउने सार्वजनिक महत्त्वको विषयवस्तु हो बताउँछन्। यो अर्थमा यस दमक व्यापारिक कम्प्लेक्सको महत्व भएको कोशी प्रदेश बासीको धारण छ।

१- देशमै पहिलोपटक झापामा यो उचाइ र महत्त्वको संरचना बनेको छ । झापाको पुरानो र ऐतिहासिक शहर दमकले अत्याधुनिक स्वरुप बोकेको दीर्घजीवनपर्यन्त रहने भव्य संरचना पाएको छ ।

२-नेपालबाहेक भारतको सिक्किम, बिहार, बंगाल सीमावर्ती क्षेत्रसमेत आकर्षित रहन सक्ने यो टावरबाट सामाजिक समृद्धिको परिचयका अलाबा आर्थिक पक्षको विकासमा टेवा हालेको छ, पर्यावरणीय महत्त्वका दृष्टिकोणले सन्तुलन कायम गर्ने भएको छ र प्राकृतिक सौन्दर्यले आकर्षित हाम्रो सांस्कृतिक छवि क्रमशः उठ्ने छ ।

३- स्थानीय उत्पादनहरूको बिक्री हुने भएको छ । बजार नपाएर भौतारिएका स्थानीय उत्पादकहरू अब उत्साहित हुनेछन् । पर्यटकको आगमनले होटल, रेस्टुरेन्ट, यातायात सेवालगायत क्षेत्रमा रोजगार सिर्जना हुने भएको छ ।

४- व्यवसायिक टावरले दमक र उर्लाबारीलाई झलमल बनाएको छ । आयआर्जनको स्रोत बढाएको छ । सयौँ मानिसले रोजगार पाउने नै छन् । स्थलगत पहिचान र परिचय कमाउने छन् । के यो सामाजिक सञ्जालमा लेखिए झैँ, कसैले लेखेको देखिए झैँ नकारात्मक अग्रसरता हो त ? नकारात्मक निर्माणको प्रतिक हो त ?

५- एउटा समय थियो– टावर भन्नेबित्तिकै यसलाई हेर्न देशभित्र होइन, देशबाहिर पनि मानिसको घुइँचो लाग्थ्यो । अहिले टावर मात्र होइन, व्यवसायिक प्रयोजनका लागि अन्तर्राष्ट्रिय स्तरको यो संरचना बनेको छ । यसलाई हाम्रो चेतनाले किन ग्रहण गर्न सक्दैन ?

६- काठमाण्डौँको धरहरा, भेडेटार र कन्यामको स्काइवाक जस्तै संरचना हो यो व्यवसायिक कम्प्लेक्स । यसमा बहुउपयोगिता पनि देखियो । यसबाट स्काइवाक र बञ्जीसमेत गराउन सके पर्यटकीय महत्त्वका हिसावले आकर्षणको केन्द्र बन्न सक्छ दमक ।

७- शहर विकास अर्थात् शहरीकरणको प्रक्रियालाई पनि फराकिलो र फाँटिलो उपस्थितिमा यहिँबाट सञ्चालनमा ल्याउन सकियो भने राजश्व, करलगायतका विषयमा हुने आम्दानी पारदर्शी हुन्छ र स्थानीय विकासमा टेवा पुग्छ ।