काठमाडौं । इजरायलले सिरियाली नौसैनिक जहाजमा आक्रमण गरेको पुष्टि गरेको छ । इजरायलले असद सरकारको विदाईपछि सिरियाको सैन्य शक्तिलाई ‘बेअसर’ गर्नका लागि यस्ता हमला गरिरहेको बताएको छ ।

इजरायली सेनाले एक विज्ञप्तिमा भनेअनुसार उसका जहाजहरूले सोमबार राति अल-बायदा र लाटाकिया बन्दरगाहहरूमा आक्रमण गरे, जहाँ १५ जहाजहरू डक गरिएका थिए।

बीबीसीले लताकिया बन्दरगाहमा भएको विस्फोटको भिडियो प्रमाणित गरेको छ। भिडियोमा जहाज र बन्दरगाहका केही भागमा ठूलो क्षति पुगेको देखियो ।

इजरायली सेनाले पनि आफ्नो लडाकु विमानले सिरियामा ३५० भन्दा बढी लक्ष्यमा आक्रमण गरेको बताएको छ ।

यसअघि बेलायतस्थित सिरियन अब्जर्भेटरी फर ह्युमन राइट्स (एसओएचआर) ले विद्रोहीहरूले असद सरकारलाई सत्ताबाट हटाएदेखि इजरायलले सिरियामा ३१० भन्दा बढी हवाई आक्रमण गरेको बताएको थियो।

इजरायली रक्षामन्त्री इजरायल काट्जले भनेका छन्, “आईडीएफको लक्ष्य इजरायललाई खतरामा पार्ने रणनीतिक क्षमताहरूलाई हटाउनु थियो।”

गत हप्ता, नाटकीय घटनाक्रममा तत्कालीन सिरियाली राष्ट्रपति बसर अल-असद सिरियाबाट भागेर रसिया गए, त्यसपछि विद्रोहीहरूले राजधानी दमास्कस कब्जा गरे।