काठमाडौं । बेलायती राजकुमार एन्ड्रयुलाई चिनियाँ जासुससँग नजिक भएको आरोप लागेको छ । चिनियाँ व्यापारी याङ टेङ्बोसँगको घनिष्ठ सम्बन्धका कारण प्रिन्स एन्ड्र्यूमाथि अनुसन्धान भइरहेको छ। याङ टेङ्बोलाई चीनका लागि जासुसी गरेको आरोप छ।

याङ टेङ्बोलाई अहिलेसम्म एच सिक्स कोड नामले चिनिन्थ्यो। तर, सोमबार अदालतले उनको नाम सार्वजनिक नगर्ने पुरानो आदेश खारेज गरेको छ । यसपछि याङको परिचय सार्वजनिक भएको थियो ।

यसैबीच, याङसँग सम्बन्धको आरोप लागेपछि राजकुमार एन्ड्र्यूले शाही परिवारको क्रिसमस उत्सवबाट टाढा रहने निर्णय गरेका छन्। उनी यस वर्षको समारोहमा सहभागी हुने छैनन् ।

प्रिन्स एन्ड्र्यू बेलायतकी पूर्व महारानी एलिजाबेथका तेस्रो सन्तान र वर्तमान राजा चार्ल्सका माइला भाइ हुन्। उनी ड्यूक अफ योर्कको रूपमा पनि चिनिन्छन्।

याङ याङ टेङ्बोलाई क्रिस याङ पनि भनिन्छ र उनी एक परामर्श फर्मका निर्देशक हुन् । याङ परामर्शदाता कम्पनी ह्याम्पटन ग्रुप इन्टरनेशनलका निर्देशक हुन्। यो कम्पनीले बेलायती कम्पनीहरूलाई चीनमा सञ्चालनका लागि सल्लाह दिने काम गर्छ।

याङ टेङ्बो यसअघि बेलायतका पूर्वप्रधानमन्त्री डेभिड क्यामरुन र थेरेसा मेजस्ता प्रमुख राजनीतिज्ञहरूसँग देखिएका थिए। प्रिन्स एन्ड्र्यूले चिनियाँ व्यवसायलाई बढावा दिन प्यालेस चाइना प्लेटफर्ममा पिच बनाए। याङ यस प्लेटफर्ममा संलग्न एक महत्त्वपूर्ण व्यक्ति हुन्।

याङलाई चिनियाँ कम्युनिष्ट पार्टी (सीसीपी)का लागि शंकास्पद गतिविधिमा संलग्न भएको आरोप छ। बेलायतको गुप्तचर एजेन्सी एमआई–५ ले याङलाई राष्ट्रिय सुरक्षामा खतरा भएको आरोप लगाएको थियो । अदालतले एजेन्सीको प्रतिवेदनलाई स्वीकार गर्दै याङको अपील अस्वीकार गर्‍यो।

राजकुमार एन्ड्र्यूले याङलाई आधिकारिक रूपमा भेटेको उनको कार्यालयले जनाएको छ । कार्यालयका अनुसार राजकुमारले याङसँग कुनै पनि संवेदनशील विषयमा छलफल गरेनन्।

स्पष्टीकरण दिँदै याङले आफूले बेलायतमा कुनै गैरकानुनी काम नगरेको बताएका छन् । याङले आफूलाई बेलायत र चीनबीच बढ्दो राजनीतिक तनावको शिकार बनाइएको आरोप लगाएका छन् । यद्यपि बेलायती प्रधानमन्त्री केयर स्टारमरले हालै चीनसँगको तनावपूर्ण सम्बन्ध सुधार्ने इच्छा व्यक्त गरेका छन् ।

स्टारमरले गत महिना जी-२० को छेउमा चिनियाँ राष्ट्रपति सी जिनपिङसँग भेटेका थिए। सन् २०१८ यता सी जिनपिङलाई भेट्ने उनी पहिलो बेलायती प्रधानमन्त्री हुन्। यद्यपि विपक्षी कन्जरभेटिभ पार्टीका नेताहरूले चीनलाई बेलायतका लागि ठूलो खतरा भनेका छन्।