काठमाडौं । दक्षिण अफ्रिका विश्व टेस्ट च्याम्पियनसिप २०२५ को फाइनलमा पुगेको छ । बोर्डर–गावस्कर ट्रफीको चौथो टेस्ट म्याचमा भारतविरुद्धको जित दर्ता गर्दै अस्ट्रेलियाले पनि आफ्नो स्थिति बलियो बनाएको छ ।

आईसीसीले अष्ट्रेलिया विश्व टेस्ट च्याम्पियनसिपको फाइनल पुग्नबाट एक जित मात्र टाढा रहेको जनाएको छ । यस्तो अवस्थामा भारतका लागि अर्को टेस्टमा जित दर्ता गर्नु निकै महत्वपूर्ण हुनेछ ।

आईसीसीले भारत फाइनल पुग्न अष्ट्रेलियाविरुद्धको अन्तिम टेस्टमा भारतले जित्नुपर्ने बताएको छ । त्यसपछि श्रीलंका र अष्ट्रेलियाबीचको टेष्ट शृंखला श्रीलंकाले जितोस् वा शृङ्खला ०–० को बराबरीमा रहोस् भन्ने आशा उसले गर्नुपर्नेछ ।

यदि यस्तो भयो भने भारत फाइनलमा पुग्न सक्छ । भारतले आफूले जितेर पनि अस्ट्रेलियाले श्रीलंकाविरुद्ध एउटै टेस्ट जितेमा भारत बाहिरिनेछ । यसका लागि भारतले श्रीलंकाको प्रदर्शनमा भर पर्नु पर्ने स्पष्ट छ ।