काठमाडाैं। प्रवासमा रहेर गीतसङ्गीतमा सक्रिय गायिका प्रीति घिमिरे नयाँ गीत ल्याएकी छिन्। शुक्रबार उनकै युट्युब च्यानलमार्फत सार्वजनिक गरिएको ‘घरको यादले’ बोलको गीतमा शब्द र सङ्गीत कविन्द्र तामाङको रहेको छ । गीतमा गायिका घिमिरेले बाध्यतामा परदेशिने नेपालीको कथालाई व्यक्त गरेकी छिन्।

‘गीतमा बाध्यताले प्रवास पुग्ने नेपालीको बुझाई र भोगाईलाई प्रस्तुत गरेकी छु। यो गीतले हामी प्रवासमा रहनेको ईच्छा र बाध्यतालाई प्रस्तुत गरेको छ । परिवारबाट टाढिएर बस्ने नेपालीको रहर नभई बाध्यता रहेको गीतले भाव व्यक्त गरेको छ’, गायिका घिमिरेले भनिन्।

अस्ट्रेलियाको सिड्नीमा उच्च शिक्षाका लागि पुगेकी गायिका घिमिरेले डान्सिङ, मेलोडियस लगायतका गीतमा ल्याईसकेकी छिन् । उनले यस गीतको लिरिकल भर्सन सार्वजनिक गरेकी छिन् ।

‘गीतबाट प्राप्त प्रतिक्रिया अनुसार हामी भिडियो पनि तयार गर्ने सोचमा छौँ । तर, अहिले गीतलाई लिरिकल भिडियो तयार गरेर ल्याएका छौँ । यो गीतले व्यक्त गरेको भावना धेरैसँग मिल्छ भन्ने लागेको छ’, उनले भनिन् । गीतलाई अर्पण थिङ्गले एरेञ्ज र मिस्किङ्ग गरेका हुन् ।