काठमाडौं । अमेरिकी विदेश मन्त्रालयले इजरायललाई ८ अर्ब डलर बराबरको हतियार दिने योजनाको बारेमा कांग्रेसलाई जानकारी दिएको छ । एक अमेरिकी अधिकारीले बीबीसीलाई यसको पुष्टि गरेका छन्।

हतियारको खेप पठाउन हाउस र सिनेट कमिटीबाट स्वीकृति चाहिन्छ। राष्ट्रपति जो बाइडेनले पद छाड्नुभन्दा पन्ध्र दिनअघि यो निर्णय लिइएको हो।

गाजामा अनगिन्ती नागरिकको मृत्यु भएपछि इजरायललाई अमेरिकी सैन्य सहायता रोक्न माग गरिएको थियो तर वाशिंगटनले ती मागहरूलाई अस्वीकार गरेको छ।

गत वर्ष अगस्टमा अमेरिकाले इजरायललाई २० अर्ब डलरको लडाकु विमान र अन्य सैन्य उपकरण बेच्न स्वीकृति दिएको थियो ।

एक अमेरिकी अधिकारीले भनेअनुसार हतियारको यो नवीनतम ब्याचमा हावाबाट हावामा मार हान्ने क्षेप्यास्त्र, हेलफायर मिसाइल, आर्टिलरी गोला र बमहरू समावेश छन्।

बिक्रीको जानकारी भएको एक स्रोतले शनिबार बीबीसीलाई भने, “राष्ट्रपतिले इजरायललाई अन्तर्राष्ट्रिय कानून र अन्तर्राष्ट्रिय मानवअधिकार कानून अन्तर्गत आफ्ना नागरिकहरूको रक्षा गर्ने र इरान र त्यसका प्रोक्सी संगठनहरूको आक्रमणको जवाफ दिने अधिकार रहेको स्पष्ट पारेका छन्।”

अमेरिकाले इजरायललाई आवश्यक पर्ने ६९ प्रतिशत हतियार र सैन्य उपकरण निर्यात गर्छ।

अक्टोबर ७, २०२३ मा हमासको आक्रमण पछि गाजामा इजरायली सैन्य कारबाहीमा ४५,५८० भन्दा बढी मानिसहरू जसमा अधिकांश महिला र बालबालिकाहरू मारिएका छन्।