काठमाडौं । रुसको राज्य पत्रिका इज्भेस्टियाले पूर्वी युक्रेनको रुसी नियन्त्रित सहर डोनेट्स्क नजिकै युक्रेनी ड्रोन हमलामा आफ्ना एक स्वतन्त्र पत्रकार मारिएको जनाएको छ ।

रुसले युक्रेनी सेनाले जानाजानी अलेक्जेन्डर मार्टेम्यानोभलाई निशाना बनाएको आरोप लगाएको छ । यद्यपी युक्रेनले यस विषयमा अहिलेसम्म कुनै प्रतिक्रिया दिएको छैन ।

इज्भेस्टियाले मार्टेम्यानोभ चढेको सिभिल कारलाई रुसको नियन्त्रित क्षेत्रमा रहेको राजमार्गमा यात्रा गर्ने क्रममा आक्रमण भएको जनाएको छ । यस आक्रमणमा अन्य पाँच सञ्चारकर्मी पनि घाइते भएका छन् ।

“युक्रेनी सेनाले इज्भेस्टियाका स्वतन्त्र संवाददाता अलेक्ज्याण्डर मार्टेम्यानोभ बोकेको एक नागरिक कारमा आक्रमण गरेको छ,” इज्भेस्टियाले आफ्नो आधिकारिक टेलिग्राम च्यानलमा भनेको छ ।

अखबारको दाबी छ कि “यो कार फ्रन्टलाइनबाट धेरै टाढा थियो।”

रुसको सरकारी समाचार एजेन्सी आरआइएले कार रुसको कब्जामा रहेको गोर्लिभका सहरमा गोलाबारी कभर गरेर फर्कदै गर्दा आक्रमण भएको बताएको छ ।

यस आक्रमणमा रियाका दुई पत्रकार पनि घाइते भएको एजेन्सीले जनाएको छ । रुसी विदेश मन्त्रालयकी प्रवक्ता मारिया जाखारोभाले घटनालाई ‘जानीजानी हत्या’ भनेकी छन् ।