काठमाडौं । सिरहाको बिष्णुपुर गाउँपालिकाकी उपाध्यक्षले आफूलाई लिन घरमा नबएको आक्रोसमा आफ्नै पालिकाको गाडी तोडफोड गरेकी छन्।

कार्यालय जानका लागि आफूलाई घरमा लिन नआएको भन्दै उपाध्यक्ष गीता कुमारी सिंहले पालिकाको बा.२झ ३६४३ नम्बरको सरकारी स्कोरपीयो तोडफोड गरेकी हुन्।

उक्त गाउँपालिकाका अध्यक्ष र उपाध्यक्ष एउटै गाडी चढ्दै आएका छन्।

उनले इँटा र ढुंगाले हानेर झ्याल तथा ढाोकाको सिसा फूटाउनुका साथै गाडीको विभिन्न भाग कुच्याएको चालक बाबुनाथ यादवले बताए। उपाध्यक्ष सिंहले घरमा लिन समयमै नपुगेको झोकमा आक्रोश पोख्दै गाडीमा क्षति पुर्‍याएको उनको भनाइ छ।

उपाध्यक्ष सिंहको दुई वर्षको कार्यकालमा कुनै पनि ठोस र सकारात्मक योगदान दिन नसकेको स्थानीयको आरोप छ। उनीमाथि बितन्डा मच्चाउने, खलल सिर्जना गर्ने र सार्वजनिक सम्पत्तिको दुरुपयोग गर्ने जस्ता गम्भीर आरोप लाग्दै आएको छ।

अध्यक्षले गाडी कब्जामा राख्ने र उपाध्यक्षले कुनै काममा जान गाडी माग्दा समयमा नदिँदा आक्रोशित हुँदै आएको एक स्थानीयले बताए।

आज पनि उपाध्यक्षले गाडी लिन बोलाउँदा नआएपछि गाउँपालिका अध्यक्षकै घरअगाडी रोकीएर राखेको गाडी उपाध्यक्षले तोडफोड गरेकी हुन्। उपाध्यक्षले ९ बजे नै घरमा लिन आउन बोलाएकोमा गाडी समयमा नगएको भन्दै तोडफोडमा उत्रेको अध्यक्ष यादवले बताए।

गाउँपालिका अध्यक्ष र प्रमुख प्रशासकीय अधिकृतले चारचक्के गाडी चढे पनि उपाध्यक्षलाई भने गाढी सुविधा दिइएको छैन। कार्यालयको एक थान सरकारी स्कोरपीओ छ। प्रशासकीय अधिकृत भाडाको गाढीमा चढ्दै आएका छन्। उपाध्यक्ष भने आफ्नो निजी मोटरसाइकल चढ्दै आएकी छन्।

आज कार्यक्रममा जान अध्यक्षसँग गाढी माग्दा पठाउँदै छु भनेर नपठाएपछि उनी आक्रोसित भएको बताइएको छ।