काठमाडौं । नेकपा (एमाले)का पूर्वनेता भीम रावलले संविधान संशोधनका नाममा जनतालाई झुक्काउने प्रयास भइरहेको बताएका छन्।

राष्ट्रिय एकता दिवसका अवसरमा बिहीबार काठमाडौंमा आयोजित एक कार्यक्रममा उनले संविधान संशोधनका निम्ति भन्दै सरकार बनाउने र त्यो काम २०८७ सालमा गर्ने तयारीले जनता झुक्काउने कार्य भएको उल्लेख गरे।

उनले जनताको आँखामा पट्टी लगाएर आफू मात्र सर्वज्ञाता बन्न खोज्ने देशको शासक हुन नसक्ने बताए। सरकार सञ्चालन गर्ने र महत्त्वपूर्ण पदमा बस्नेले देशलाई आफ्नो हितअनुकूल प्रयोग गरेको आरोप समेत उनले लगाए।

रावलले देशभक्तको बलिदानको आडमा भ्रष्टाचारको खेती मौलाइरहेको टिप्पणी गरे। उनले देशभक्तले मुलुकमा स्थापित गरेको जगलाई भत्कन नदिन एक भई डटेर सामना गर्नुपर्ने धारणा राखे।