काठमाडौं । अमेरिकी संसदको तल्लो सदन हाउस अफ रिप्रिजेन्टेटिभले बिहीबार अन्तर्राष्ट्रिय फौजदारी अदालत (आईसीसी) लाई प्रतिबन्ध लगाउने विधेयक पारित गरेको छ ।

इजरायली प्रधानमन्त्री बेन्जामिन नेतान्याहु र पूर्व रक्षामन्त्री योभ गालान्ट विरुद्ध आईसीसीले पक्राउ पुर्जी जारी गरेपछि अमेरिकाले यो कदम उठाएको हो ।

विधेयकमा मतदानका क्रममा २४३ सांसदले यसको पक्षमा मतदान गरेका थिए भने १४० सांसदले विपक्षमा मतदान गरेका थिए । समर्थन गर्नेमा रिपब्लिकन पार्टीका १९८ र डेमोक्रेटिक पार्टीका ४५ सांसद थिए । कुनै पनि रिपब्लिकन सांसदले विधेयकको विरोध गरेनन्।

आईसीसीले गाजामा युद्ध अपराध, मानवअधिकार उल्लङ्घन र नरसंहारको आरोपमा नेतान्याहु र गालान्ट विरुद्ध पक्राउ पुर्जी जारी गरेको छ।

अमेरिकाले यसअघि नै आईसीसीलाई प्रतिबन्ध लगाएको छ । यसअघि डोनाल्ड ट्रम्पले आफ्नो पहिलो कार्यकालमा सन् २०२० मा आईसीसीमाथि प्रतिबन्ध लगाएका थिए ।

वास्तवमा आईसीसीले अफगानिस्तानमा अमेरिका र प्यालेस्टाइनमा इजरायलको आपराधिक गतिविधिको अनुसन्धान सुरु गरेको थियो । यसविरुद्ध ट्रम्प प्रशासनले आईसीसीमाथि प्रतिबन्ध लगाएको थियो । यद्यपि, जो बाइडेन राष्ट्रपति भएपछि यी प्रतिबन्धहरू हटाइयो।

बिहीबार सदनले विधेयक पारित गरेपछि विदेश मामिला समितिका रिपब्लिकन अध्यक्ष ब्रायन मास्टले भने “अमेरिकाले यो कानून पारित गरेको छ किनभने कंगारु अदालतले हाम्रो सहयोगी इजरायलका प्रधानमन्त्रीलाई पक्राउ गर्न चाहन्छ।”

नेतान्याहु विरुद्ध पक्राउ पुर्जी जारी भएपछि धेरै देशले विभिन्न अडान अपनाएका छन् ।