काठमाडौं। काठमाण्डु माभरिक्सले पोखरा लेकर्सलाई पराजित गर्दै नेपाल कबड्डी लिग (एनकेएल)मा विजयी सुरूवात गरेको छ।

त्रिपुरेश्वरस्थित दशरथ रंगशालामा आज साँझ सम्पन्न उद्घाटन खेलमा काठमाण्डुले पोखरा लेकर्सलाई ४२-४१ ले पराजित गर्दै विजयी भएको हो। जितसँगै काठमाडुले पाँच अंक जोडेको छ। त्यस्तै पराजित पोखराले एक अंक प्राप्त गर्‍यो।

एस्ट्रोनिक्स म्यानेजमेन्टद्वारा आयोजित उक्त प्रतियोगितामा छ सहरका छ टिम सहभागी छन्। जसमा विराटनगर ब्यान्डिट्स, जनकपुर नाइट्स, काठमाण्डु माभरिक्स, पोखरा लेकर्स, हिमालयन रेइडर्स (बुटवल) र धनगढी वाइल्डक्याट्स छन्।

उक्त प्रतियोगिताअन्तर्गत भोलि दुई खेल हुनेछ। बेलुका ५ः३० बजे हुने पहिलो खेलमा विराटनगर ब्यान्डिट्स र धनगढी वाइल्डक्याट्सबीच प्रतिस्पर्धा हुनेछ। त्यस्तै ६ः३० बजे हुने दोस्रो खेलमा हिमालयन रेइडर्स (बुटवल) र जनकपुर नाइट्स आमनेसामने हुनेछन्।