काठमाडौं । बर्दीया प्रहरीले लागूऔषधसहित तीन किशोरलाई पक्राउ गरेको छ। बाँसगढी नगरपालिका–३ मानखोला स्थितबाट लागूऔषध ब्राउन सुगरसहित उनीहरूलाई सोमबार नियन्त्रणमा लिइएको हो।

प्रहरीका अनुसार पक्राउ पर्नेमा बाँके बैजनाथ गाउँपालिका–६ का १५, १६ र १७ वर्षका किशोरहरू रहेका छन्। उनीहरूको नाम थर खुलाइएको छैन।

जिल्ला प्रहरी कार्यालय गुलरियाका डीएसपी ऋषिराम घर्ती मगरका अनुसार बाँसगढी नगरपालिका–३ मानखोला स्थित खुसिया थारुको पुरानो खाली घरमा लागूऔषध किनबेच भइरहेको भन्ने गोप्य सूचना प्रहरीले पाएको थियो। सोही सूचनाका आधारमा खटिएको प्रहरीले टोलीले उनीहरुलाई लागूऔषधसहित फेला पारी नियन्त्रणमा लिएको हो।

किशोरहरूलाई नियन्त्रणमा लिइ खानतलासी गर्दा रातो रङको प्लाष्टिकले बेरेर राखिएको अवस्थामा १२ पुरिया ३ सय ४० मिलिग्राम लागूऔषध ब्राउन सुगर फेला परेको प्रहरीले जनाएको छ।