टीकापुर । उपप्रधानमन्त्री एवं सहरी विकास मन्त्री प्रकाशमान सिंहले सरकारले स्मार्ट सिटी र नयाँ सहरको काम क्रमिक रूपमा अघि बढाउने बताएका छन्। टीकापुरमा रहेको वीरेन्द्र विद्यामन्दीरको स्वर्ण महोत्सव समारोह उद्घाटन गर्दै उनले यस्तो बताएका हुन्।

उपप्रधानमन्त्री सिंहले टिकापुरलाई स्मार्ट सिटिका रूपमा विकास गर्ने काम अघि बढिसकेको भन्दै सरकारले घोषणा गरेका स्मार्ट सिटि र नयाँ सहरको काम अब क्रमिक रूपमा अगाडि बढ्ने बताए। त्यस्तै, टिकापुर शैक्षिक शहरका रूपमा विकसित भएकोमा खुशी व्यक्त गर्दै उनले अब शिक्षालाई सीपसँग जोडनुपर्नेमा जोड दिए।

उनले विद्यार्थीको शैक्षिकसँगै उनीहरूको रुचिको क्षेत्रमा पनि प्रेरित गरेर शिक्षाको गुणस्तरसँगै समग्र व्यक्तित्व विकासमा ध्यान दिन आग्रह गरे। ‘यहाँबाट उत्तिर्ण भएर जाने विद्यार्थीले देशलाई, समाजलाई योगदान गर्न सक्ने बनाउन शिक्षकले विशेष ध्यान दिनुपर्छ,’ उपप्रधानमन्त्री सिंहले भने, ‘शैक्षिक सर्टिफिकेटसँगै केही न केही सीपको सर्टिफिकेट भयो भने आगामी दिन सहज हुन्छ। विद्यार्थीको समग्र विकासमै अब जोड दिनुपर्छ।’

त्यस्तै उनले विद्यार्थीले पाठ्यक्रमसँगै राजनीतिक, सामाजिक, आर्थिक विषयमा चासो राख्नुपर्ने बताए। समाजमा देखिएका बेथितिबारे चासो राखेर समाधानका लागि पनि विद्यार्थीले योगदान गर्न भूमिका खेल्ने उपप्रधानमन्त्री सिंहले विश्वास व्यक्त गरे।

विरेन्द्र विद्या मन्दिरले विगतदेखि नै गुणस्तरीय शिक्षा प्रदान गरिरहेको भन्दै उपप्रधानमन्त्री सिंहले प्रशंसा पनि गरे। यहाँ अध्ययन गरेका विद्यार्थीले अहिले विभिन्न क्षेत्रमा योगदान गरिरहेको भन्दै विद्यालयले दिएको असल शिक्षाकै कारण त्यो सम्भव भएको बताए। उनले आगामी दिनमा अझ राम्रो गर्न शुभकामना दिए।

स्वर्ण महोत्सवका अवसरमा विद्यामन्दीरबाट अध्ययन गरी समाजका विविध क्षेत्रमा योगदान गरिरहेका व्यक्तित्वलाई सम्मान गरिएको थियो। विद्यामन्दीरका पूर्व विद्यार्थी काठमाडौं प्रहरी परिसरका प्रमुख विश्व अधिकारी, सहरी विकास मन्त्रालयका उपसचिव झपट विश्वकर्मा, वरिष्ठ पत्रकार प्रशान्त अर्याललगायतलाई सम्मान गरिएको थियो।

कार्यक्रममा सुदूरपश्चिम प्रदेशका मुख्यमन्त्री कमल बहादुर शाह, नागरिक उन्मुक्ति पार्टीका संस्थापक रेशम चौधरी , कांग्रेस नेता रणबहादुर रावललगायतको सहभागिता थियो। आजबाट सुरु भएको महोत्सव तीन दिन चल्नेछ।