काठमाडौं। प्रेस काउन्सिल नेपालका अध्यक्ष बालकृष्ण बस्नेतले पत्रकारिता क्षेत्रमा शुद्धीकरणको आवश्यकता रहेको बताएका छन्।

संघीय संसद सचिवालयले युट्युब पत्रकार प्रकाश वली र किशोरकुमार श्रेष्ठको संसद प्रवेश पास निलम्बन गरेलगत्तै पत्रकारको नियामक निकाय काउन्सिलका अध्यक्षको धारणा सार्वजनिक भएको हो। ‘पत्रकार पत्रकार मात्र भइरहे र पत्रकारले पत्रकारिता बाहेक अरू सबै काम गर्ने अहिलेको कतिपय प्रवृत्तिको अन्त हुन सके, हिजोआज देखिएका समस्या आफैं हल हुन्छन्,’ अध्यक्ष बस्नेतको भनाइ छ।

संसद सचिवालयले पत्रकारिताको मर्यादा र आचारसंहिताको पालना गराउन संसद प्रवेश पास निलम्बन गरेको बताएको छ। प्रधानमन्त्री केपी शर्मा ओली र सांसदहरूसँग संवादका क्रममा अमर्यादित शब्द प्रयोग गरेको भन्दै महासचिव स्तरीय निर्णयबाट प्रवेश पास निलम्बन गरिएको हो।

संसद सचिवालयले पत्रकारलाई संसदभित्र रिपोर्टिङका लागि पास उपलब्ध गराउँदै आएको छ। यस घटनाले पत्रकारिताको मर्यादा, स्वतन्त्रता र दायित्वबारे नयाँ बहस सुरु गरेको छ।

युट्युब पत्रकार प्रकाश वली र किशोरकुमार श्रेष्ठको संसद प्रवेश पास निलम्बनका विषयमा पत्रकारहरूको मिश्रित धारणा आइरहेको छ।