काठमाडौं । युक्रेनी अधिकारीहरूले शनिबार बताएअनुसार पछिल्ला रुसी आक्रमणहरूमा कम्तीमा २५ जनाको मृत्यु भएको छ।

डोनेट्स्कमा भएको आक्रमणमा कम्तिमा ११ जनाको मृत्यु भएको र ४० जना घाइते भएको स्थानीय अधिकारीहरूले बताएका छन्। यसमा ६ जना बालबालिका पनि छन्।

आक्रमणमा खार्किभ र ओडेसा लगायत अन्य क्षेत्रहरूमा रहेका आवासीय परिसर र पूर्वाधारहरू पनि लक्षित थिए।

वास्तवमा, अमेरिकाले युक्रेनलाई सैन्य सहायता र गोप्य जानकारी दिन प्रतिबन्ध लगाएको छ। यसपछि, पछिल्ला दिनहरूमा रुसले युक्रेनमाथि आक्रमण तीव्र पारेको छ।

युक्रेनमा रुसको पछिल्लो आक्रमणपछि पोल्याण्डका प्रधानमन्त्री डोनाल्ड टस्कले सामाजिक सञ्जालमा एउटा पोस्ट लेखेका छन्।

“जब तपाईं कुनै बर्बरलाई खुसी पार्नुहुन्छ तब यस्तै हुन्छ,” उनले लेखे “धेरै बम, धेरै क्रोध, धेरै पीडितहरू।”

यसअघि, गत हप्ता राष्ट्रपति डोनाल्ड ट्रम्प र युक्रेनी राष्ट्रपति भोलोडिमिर जेलेन्स्कीबीच अमेरिकी राष्ट्रपति कार्यालयमा भेटवार्ता भएको थियो।

रुस र युक्रेनबीच युद्धविराम गराउने प्रयास गर्ने उद्देश्यले भएको बैठक चर्को बहसमा परिणत भयो।

युक्रेनमाथि यो आक्रमण अमेरिकी राष्ट्रपति डोनाल्ड ट्रम्पको त्यो बयानपछि भएको हो, जसमा उनले रुसमाथि ठूलो मात्रामा प्रतिबन्ध र कर लगाउने सोचमा रहेको बताएका थिए।

युक्रेनले यसअघि बिहीबार राति भएको रुसी आक्रमणमा पाँच जनाको मृत्यु भएको बताएको थियो।