जनकपुर । यस वर्षको महामूर्खको उपाधि मधेश प्रदेशका मुख्यमन्त्री सतिशकुमार सिंहलाई प्रदान गरिएको छ।

होली पर्वका अवसरमा जनकपुरधाममा मिथिला नाट्यकला परिषद् (मिनाप)ले आयोजना गर्दै आएको सांस्कृतिक कार्यक्रम ‘महामूर्ख सम्मेलन’को दोस्रो दिन शुक्रबार मुख्यमन्त्री सिंहलाई महामूर्खको उपाधि प्रदान गरेको छ। मुख्यमन्त्री सिंहले स्वास्थ्य क्षेत्रमा गरेका कार्यहरुको प्रसंसा गर्दै उनलाई ठट्टा स्वरुप महामूर्खको उपाधि प्रदान गरिएको हो।

होलीका अवसरमा मिनापले हरेक वर्ष यो सम्मेलन आयोजना गर्दै आएको छ। कार्यक्रममा हास्यव्यङ्ग्य र सांस्कृतिक प्रस्तुति प्रस्तुत गरिनुका साथै कला र संस्कृतिको संरक्षणमा योगदान पुर्‍याउँदै आएको छ। होली पर्वको पौराणिक गाथा, ख्यालठट्टा र मैथिली भाषामा गाइने जोगिरा गीतको संरक्षण गर्न यो कार्यक्रम २०६१ सालदेखि आयोजना भइरहेको छ।

२०६१ सालमा मैथिली कवि नरेश ठाकुर, २०६२ मा नेकपा एमालेका नेता शीतल झा, ०६३ मा जनकपुर नगरपालिकाका मेयर हरिबहादुर बिसी, २०६४ मा सद्भावना पार्टीका नेता ओमकुमार झा लगायतलाई महामूर्ख उपाधि दिइएको थियो।

त्यसैगरी २०६५ मा साहित्यकार डा. राजेन्द्र विमल, २०६६ मा पूर्वमन्त्री रामचन्द्र झा, ०६७ मा राजनीतिक विश्लेषक सिके लाल, २०६८ मा साहित्यकार रामभरोष कापडी भ्रमर, २०६९ मा नेपाली कांग्रेसका नेता रामसरोज यादव र २०७० मा तमलोपाका नेता डा. विजयकुमार सिंहलाई पनि महामूर्ख उपाधि दिइएको थियो।

०७१ सालमा शत्रुधन महतो, २०७२ मा पवन सिंघानिया, २०७३ मा सप्तरीको मलेठमा प्रहरीको गोली लागेर ५ जनाको मृत्यु भएको घटनापछि मिनापले कार्यक्रम स्थगित गरेको थियो। २०७४ देखि २०८० सालसम्म विभिन्न प्रमुख र चर्चित व्यक्तिहरूलाई महामूर्खको उपाधि प्रदान गरिएको छ।

जसमा पूर्वराष्ट्रिय सभा सदस्य वृषेशचन्द्र लाल, जनकपुरधामका मेयर लालकिशोर साह, पूर्वमुख्यमन्त्री लालबाबु राउत, महजोडी मदन कृष्ण श्रेष्ठ र हरिवंश आचार्य लगायतका व्यक्तित्वलाई समावेश गरिएको थियो।