खोटाङ। हलेसी तुवाचुङ नगरपालिका–५ दुर्छिम गाउँमा बिहीबार दिउँसोदेखि लागेको डढेलो राति नियन्त्रणमा लिइएको छ। इलाका प्रहरी कार्यालय हलेसी, नगर प्रहरी र स्थानीयवासीको सहयोगमा डढेलो नियन्त्रणमा लिइएको हो।

नगरपालिकाका प्रवक्ता कमल गिरीका अनुसार डढेलोका कारण चार घर र दुई मटान जलेर नष्ट भएका छन्। दुर्छिमको गणेशटारस्थित तेर्सालुङ सामुदायिक वनमा लागेको डढेलो गाउँ पस्दा चुमाखुका घनश्याम राई, दाप्सामाका पूर्णबहादुर राई र गणेशटारका जगबहादुर राई, रुङकाडोका रणबहादुर राईका घर जलेको जनाउँदै उनले चुमाखुका वीरगञ्ज राई र दिलकुमारी राईको मटान जलेर नष्ट भएको बताए।

सुनकोशी किनारबाट सुरु भएको डढेलो तेर्सालुङ सामुदायिक वन हुँदै गाउँ पसेको थियो। ‘गाउँको चारैतिरबाट फैलिएको डढेलो राति अबेर नियन्त्रणमा लिन सफल भएका छौँ। डढेलो नियन्त्रणमा लिन इलाका प्रहरी, नगर प्रहरी र स्थानीयले सहयोग गरेका छन’, उनले भने, ‘आगलागीमा मानवीय क्षति भने भएको छैन। घरका साथै खाद्यान्नसहित सम्पूर्ण सामग्री जेका छन्। डढेलो पीडित परिवारलाई सुरक्षित स्थानमा सारेका छौँ। आगलागीबाट भएको क्षतिको यकिन विवरण आउन बाँकी छ।’

सामुदायिक वनमा लागेको डढेलो दुर्छिमका विभिन्न गाउँ तथा बस्तीमा छिर्न थालेपछि स्थानीयको भागाभाग भएको थियो। सुक्खाग्रस्त क्षेत्रमा पर्ने दुर्छिममा आगलागी भएको समयमा हुरिबतास चलिरहेकाले ठूलो क्षति भएको नगर प्रवक्ता गिरीले बताए। गाउँ पसेको डढेलो नियन्त्रणमा आए पनि सामुदायिक वनमा भने आगो नियन्त्रण बाहिर रहेको उनले जानकारी दिए।

सामुदायिक वनमा लागेको डढेलोले करोडौँ मूल्यको जडीबुटी, काठपात, जङ्गली जनावर र चराचुरुङ्गीको क्षति भएको हुनसक्ने स्थानीय तामन राईले बताए। उक्त डढेलोको कारण अहिलेसम्म खुल्न नसकेको प्रहरीले जनाएको छ।

यसअघि गत फागुन ४ गते हलेसी तुवाचुङ–७ महादेवस्थानस्थित हलेसी बजारमा चार घर र यही चैत ४ गते हलेसी तुवाचुङ-२ डिकुवामा नौ घर जलेर नष्ट भएका थिए। त्रिधार्मिकस्थल हलेसी बजारमा खाना पकाउने ग्यासको सिलिन्डरबाट सल्किएको आगोका कारण रु सात करोड ५० लाख र डिकुवामा वनमा लागेको डढेलो गाउँ पस्दा रु ७७ लाख बढीको क्षति भएको इलाका प्रहरी कार्यालयले जनाएको छ।

हलेसी बजारका आगलागी पीडितका लागि नगरपालिकाले स्थापना गरेको विपद् व्यवस्थापन कोषमा संकलन भएको रु २२ लाख राहत रकम उपलब्ध गराइएको छभने डिकुवाका लागि राहत संकलन भइरहेको नगर कार्यालयले जनाएको छ। डिकुवावासीका लागि जिल्ला प्रशासन कार्यालय खोटाङले प्रतिपीडित घरका लागि रु १५ हजार र नगरपालिकाले रु दश हजार नगद उपलब्ध गराएका छन्।