ढोरपाटन (बागलुङ)। पूर्वउपप्रधानमन्त्री एवं गृहमन्त्री नारायणकाजी श्रेष्ठले संघीयतालाई सुदृढ बनाउन जरूरी रहेको बताएका छन्। बागलुङ नगरपालिकामा आज आयोजित भेटघाट कार्यक्रममा उनले संघीयताविरुद्ध विभिन्न गतिविधि भइरहेका भन्दै तिनलाई परास्त गर्न थप सुदृढीकरणका काम गर्न आवश्यक रहेको बताएका हुन्।

नेकपा (माओवादी केन्द्र) का वरिष्ठ उपाध्यक्ष श्रेष्ठले जनताको नजिक रहेको स्थानीय सरकारलाई अधिकार सम्पन्न बनाउनुपर्नेमा जोड दिए। संविधानले स्थानीय तहलाई बलियो बनाउने व्यवस्था गरेको भन्दै उनले जनताका आधारभूत आवश्यक पूरा गर्न गम्भीर भएर लाग्न जनप्रतिनिधिलाई आग्रह गरे।

वरिष्ठ उपाध्यक्ष श्रेष्ठले भने, ‘संघीय व्यवस्थालाई थप सबल र सरल बनाउनुपर्छ। तीनै तहका सरकारलाई बलियो र मजबुत बनायौँ भने मात्रै नागरिकले सं३ीयताको अनुभूति गर्न सक्छन्। यसमा केन्द्र सरकारले आवश्यक सहयोग र सहजीकरण गर्नुपर्छ। स्थानीय तहलाई थप बलियो बनाउन समानुपाति ढंगले बजेट व्यवस्थापन तथा वितरणमा ध्यान दिनुपर्छ।’

सरकारले संघीयताको आभास हुने गरी सेवा प्रवाहलाई प्रभावकारी गराउनु पर्नेमा उनले जोड दिए।