काठमाडौं । के डोनाल्ड ट्रम्प तेस्रो पटक अमेरिकी राष्ट्रपति बन्न सक्छन् ? के अमेरिकी संविधान अनुसार कुनै पनि व्यक्ति तेस्रो पटक राष्ट्रपति बन्न पाइन्छ ? ट्रम्पले तेस्रो पटक राष्ट्रपति बन्नेबारे धेरै पटक आफ्नो मनसाय व्यक्त गरिसकेका छन्। हालैको एक अन्तर्वार्तामा उनलाई फेरि यो प्रश्न सोधिएको थियो जसमा उनले तेस्रो पटक राष्ट्रपति बन्न सक्ने तरिकाहरूबारे छलफल गरेका थिए।

एनबीसी न्यूज च्यानललाई दिएको अन्तर्वार्तामा ट्रम्पले आफू तेस्रो कार्यकालको लागि राष्ट्रपति बन्ने बारेमा सोचिरहेको र यसका लागि संविधान संशोधन गर्ने सोचमा रहेको बताएका छन्। उनले तेस्रो पटक राष्ट्रपति बन्न संविधानमा प्रावधान रहेको र आफू यसमा गम्भीर रहेको बताए।

यस क्रममा ट्रम्पलाई सोधिएको थियो – ‘ती विधिहरू के हुन् ?’ यसबारे ट्रम्पले भने – ‘यो गर्न धेरै तरिकाहरू छन्।’ जेडी भान्सले राष्ट्रपति चुनाव लड्ने र चुनाव जितेपछि उनले ट्रम्पलाई राष्ट्रपतिको कुर्सी सुम्पने हो ? भनेर सोध्दा ट्रम्पले तुरुन्तै जवाफ दिए ‘यो पनि एक प्रभावकारी तरिका हो तर यस बाहेक अन्य धेरै तरिकाहरू छन्। यसमा संविधान संशोधन पनि समावेश छ।’

यदि ट्रम्पले तेस्रो पटक राष्ट्रपति बन्ने प्रयास गरे भने यसका लागि उनले संविधान संशोधन गर्नुपर्नेछ। संविधान संशोधन गर्नको लागि अमेरिकी कांग्रेस (हाउस र सिनेट) र राज्यहरूबाट समर्थन आवश्यक पर्नेछ।

यसका लागि ट्रम्पले अमेरिकी सिनेट र प्रतिनिधि सभामा दुई तिहाइ बहुमतले विधेयक पारित गर्नुपर्नेछ। ट्रम्पको हालको कार्यकाल २०२९ मा समाप्त हुनेछ। अमेरिकामा एक व्यक्ति दुई पटक मात्र राष्ट्रपति बन्ने प्रावधान छ। उनी नोभेम्बर २०२४ मा दोस्रो पटक देशको राष्ट्रपति निर्वाचित भएका हुन् ।

ट्रम्पले धेरै पटक तेस्रो कार्यकालको लागि चुनाव लड्ने बारेमा बोलेका छन्। नोभेम्बरमा चुनाव जितेपछि र जनवरीमा शपथ लिनुअघि पनि उनले यही कुरा भनेका थिए। जनवरीमा नै ट्रम्पको रिपब्लिकन पार्टीका सांसद एन्डी ओगल्सले संसदमा एउटा विधेयक पेश गरेका थिए। ट्रम्पलाई तेस्रो पटक राष्ट्रपति बन्न अनुमति दिन यो विधेयक संसदको तल्लो सदन प्रतिनिधि सभामा पेश गरिएको थियो।

यस विधेयकमा भनिएको थियो ‘यदि कुनै व्यक्ति लगातार दुई कार्यकाल राष्ट्रपति भएको छ भने ऊ तेस्रो पटक राष्ट्रपति पदमा निर्वाचित हुन सक्दैन। तर ट्रम्प २०२० को चुनावमा बाइडेनसँग हारे। यस्तो अवस्थामा उनी तेस्रो पटक पनि राष्ट्रपति निर्वाचित हुन योग्य छन्।’