काठमाडौं। ज्योतिष पण्डित डाक्टर रुद्रनाथ अधिकारीले ग्रहगोचरीय हिसावले २०८२ नेपालको र विश्व राजनीति निकै उतारचढावपूर्ण रहने बताएका छन्। डिसी नेपालसँगको संवादमा उनले सनिग्रह चैत १६ बाट मिन राशीमा गोचर गर्ने र वृहस्पती अतिचारी अवस्थामा रहने भएकाले दुर्वेक्षा, पीडा र दैविक विपदाको सामना गर्नुपर्ने बताए।

‘राजा र मन्त्रीको पद सूर्य नारायणले लिनु भएको छ। सूर्य अति उग्र ग्रह हो। यो युद्ध कारक ग्रह हो। राजा र मन्त्री एकै ग्रहले लिँदा शासक तानाशाह बन्छ। करेक्सन मिनराशीले गराउँछ। अहिले यस्तो गोचर बनेको छ’, उनले भने। उनले जगत कुण्डलीको आधारमा शासन परिवर्तनको योगसमेत रहेको प्रस्ट्याएका छन्। चैत १७ गते ४:१२ मा सम्वतसर परिवर्तन हुने अधिकारीले बताएका छन्।

नेपाली सत्ताका लागि कुलमान, बालेन र पूर्वराजा ज्ञानेन्द्र घातक बनिरहेको ज्योतिष अधिकारीको टिप्पणी छ। उनले कुलमानलाई छोएर गलत गरेको उनले बताए। ‘चैत्र २४ देखि वैशाख ४ गतेबीच एउटा भूमरि आउँछ। विश्वमा एउटा आतंक सुरु हुने योग छ। नेपालमा पनि त्यस्तै योग छ,’ उनले भने।

राजाको पक्षमा माहोल बनिरहेकाले राजनीतिक दलहरू आत्तिरहेको उनले बताए। ‘करेक्सनको समय भएकाले राजाबादीहरूको आन्दोलत त्यत्तिकै तुहिएर जाँदैन। चैत १६ गते कटाउँदा अगाडिको अवस्था प्रधानमन्त्री केपी शर्मा ओलीको साढे साति सकिन्छ भनेको थिए। १६ पूर्व नै उहाँका गतिविधिले उहाँलाई परास्त गर्दैछ,’ उनले भने।

ज्योतिष अधिकारीले कांग्रेस सभापति शेरबहादुर देउवाको राजनीतिक भविष्य पनि सुखद नरहेको बताएका छन्। ‘उहाँको ग्रह साढे सातिबाट अन्त्य साढेति तिर जाँदै छ। उहाँ पाँच पटक मात्र प्रधानमन्त्री हो। अब उहाँको प्रधानमन्त्रीको योग छैन। अब शेयरबहादुरको समय राजनीतिक अन्त्यको स्थितिमा छ। यो गठबन्धन पनि टुट्छ। जति अगाडि बढाउन खोजे पनि जाँदैन,’ उनले भने।

उनले माओवादी अध्यक्ष पुष्पकमल दाहाल प्रचण्डलाई तिगडमबाज नेताको संज्ञा दिएका छन्। उनमा अवसरको छिणीमा छिर्ने प्रवृत्ति रहेको उनको भनाइ छ। कार्तिक १ गतेसम्म प्रचण्डको गोचर राम्रो भए पनि त्यसपछि उनी टिक्न नसक्ने अधिकारीले बताए। प्रचण्डले देउवा र ओलीभन्दा समयको लाभ लिन सक्ने योग रहेको उनले बताए।

यस्तै राष्ट्रिय स्वतन्त्र पार्टी (रास्वपा) सभापति रवि छामिछानेको भविष्य पनि स्वर्णिम नरहेको औंल्याएका छन्। रविको जुनसुकै क्षेत्रमा इन्डिङ राम्रो नरहेको उनले बताए। ‘रविले राजनीति गर्नै हुँदैन। रवि र प्रचण्डको राजनीतिक अवसर एउटै हो। रास्वपाको भविष्य पनि उदयीमान छैन। लामो यात्रा देखिँदैन,’ उनले भने। यी सबै घटनाक्रम हर्दा राजाकै पक्षमा माहोल बन्दै गएको बताएका छन्।