काठमाडौं । अन्तर्राष्ट्रिय रेडक्रस तथा रेड क्रिसेन्ट सोसाइटीज महासंघ (आइएफआरसी) ले इजरायली सेनाको निन्दा गरेको छ।

आइएफआरसीद्वारा जारी प्रेस विज्ञप्ति अनुसार गाजामा ड्युटीमा रहेका प्यालेस्टिनी रेड क्रिसेन्ट सोसाइटीका आठ सदस्यहरू इजरायली सेनाको आक्रमणमा मारिएका छन्।

आइएफआरसीका अनुसार मार्च २३ मा अल-हाशाशिनमा नौ सदस्यीय आपतकालीन चिकित्सा टोली इजरायली आक्रमणको चपेटामा परेको थियो । यसपछि, टोलीका सदस्यहरू र उनीहरूको एम्बुलेन्सको कुनै पत्ता लागेन।

आइएफआरसीका अनुसार मार्च ३० मा टोलीका आठ सदस्यहरूको शव फेला परेको थियो, जबकि एक सदस्य अझै बेपत्ता छन्।

बीबीसीको रिपोर्ट अनुसार इजरायली सेनाले आफ्ना सैनिकहरूले हेडलाइट वा आपतकालीन संकेत बिना ‘शंकास्पद रूपमा’ चलिरहेका धेरै सवारी साधनहरूमा गोली प्रहार गरेको बताएको छ ।

इजरायली सेनाले मारिनेहरूमा एक हमास कार्यकर्ता र “आठ अन्य आतंककारी” रहेको बताएको छ।